ارامىزدا قازىرگى قوعامنىڭ قالپىن اڭداپ, ەلدىڭ ەرتەڭى ءۇشىن الاڭدايتىن كاسىپكەرلەر دە بار. ماسەلەن رۋدنىيدا بىرنەشە كوپقاباتتى تۇرعىن ءۇي تۇرعىزىپ جاتقان «QC نolding» قۇرىلىس كومپانياسىنىڭ باسشىسى نۇرالحان ءامىرحان ۇلى وتكەن جىلدان بەرى كوپكە ونەگە بولارلىق ورەلى جول باستاپ, بالالاردى كىتاپ وقۋعا باۋلىپ ءجۇر.
بۇعان دەيىن ماڭعىستاۋدىڭ مۇنايلى اۋدانىندا, توبىل وڭىرىندەگى رۋدنىي قالاسىندا بەيىمبەت مايلين, تولەن ابدىك سىندى ادەبيەت الىپتارىنىڭ شىعارماشىلىعىنا ارنالعان ءتورت بىردەي بايقاۋ وتكىزگەن كاسىپكەر رۋدنىي قالاسىندا وتكەن ء«ابىش وقۋلارىن» قورىتىندىلاپ, جەڭىمپاز وقۋشىلارعا باعالى سىيلىقتار تابىس ەتتى.
جاس وقىرماندار جارىسىنا قوستاناي, رۋدنىي قالالىق مەكتەپتەرىنىڭ 8-11 سىنىپ وقۋشىلارى قاتىستى. بارلىعى – 89 بالا بايقاۋدىڭ ءبىرىنشى كەزەڭىندە حالىق جازۋشىسى ءابىش كەكىلباي ۇلىنىڭ شىعارمالارى بويىنشا تەست ساۋالدارىنا جاۋاپ بەردى. ودان ىرىكتەلىپ شىققان 35 بالا جازۋشىنىڭ «باسەكە» پوۆەسىنىڭ مازمۇنىن تالداپ, تارقاتىپ ەسسە جازىپ شىقتى.
بايقاۋ جەڭىمپازدارى رۋدنىيداعى وقۋشىلار سارايىندا ماراپاتتالدى. جيىن بارىسىندا اتالعان قۇرىلىس كومپانياسىنىڭ باسشىسى وزدەرى وتكىزىپ وتىرعان «QC Read» جوباسى اياسىنداعى ءبىلىم جارىسىنىڭ ءمان-ماڭىزى جونىندە ايتتى.
«ادەتتە بيزنەس سالاسىندا جۇرگەن ادامدار سپورتتى, باسقا دا سالالاردى قولداپ جاتادى. كوبىنە ءبىلىمدى قوعام قالىپتاستىرماي ەلىمىز ىلگەرى باسپايتىنى ەسكەرىلمەيتىنى بار. قانداي ساياسات جۇرگىزسەڭىز دە, قانداي قارجىلاي قولداۋ جاساساڭىز دا, ءبىلىم بولماعان جەردە قوعام دا, ادام دا دامىمايدى. نەگە دامىعان مەملەكەتتەردىڭ ازاماتتارى كوپ وقيدى؟ مىسالى, ۇلىبريتانيادا ادام سانىنا شاققاندا ءبىر ادام كۇنىنە ون بەت وقيدى ەكەن. سوندىقتان ءبىزدىڭ جوبامىز نەگىزىنەن وقيتىن جاستاردىڭ قاتارى كوبەيسە ەكەن دەگەن نيەتتەن تۋعان. بايقاۋدا 89 وقۋشى باق سىنادى. بۇل دا جامان ەمەس. ەندى ورالحان بوكەيدىڭ شىعارماشىلىعىن دارىپتەۋدى كوزدەپ, كاتونقاراعايدا وقۋشىلاردىڭ جازعى لاگەرىن ۇيىمداستىرۋدى ويلاستىرىپ جاتىرمىز. ماقسات – وقيتىن بالالاردىڭ سانىن كوبەيتۋ. وقۋدى ادەتكە اينالدىرۋ. وقيتىن بالا لۋدومانيا, ناشاقورلىق دەگەن جامان نارسەلەردەن بويىن اۋلاق ۇستايدى. جۇزدەن جۇيرىك شىققان جاس وقىرمان باعالى سىيلىقتارعا يە بولادى. الداعى ۋاقىتتا سىيلىق قورىن ۇلعايتىپ, قارجىلاي سىيلىقتار تاعايىنداۋدى ءجون كورىپ وتىرمىز», دەدى نۇرالحان ءامىرحان ۇلى.
كومپانيا باسشىسى 89 بالانىڭ ىشىنەن وزىپ شىققان جىتىقارا مەكتەبىنىڭ وقۋشىسى اسىلزادا بەرەكەتوۆاعا, قوستاناي قالاسىنان كەلگەن ديليارا باعلانقىزىنا, رۋدنىيلىق كاۋسار قاسىمبەك, ايدانا ناعمەتوۆا, نازكەن كۇزىباەۆالارعا «ايفون», «ايپاد» ءتارىزدى باعالى سىيلىقتار تابىس ەتتى.
نۇرالحان ءامىرحان ۇلى الداعى ۋاقىتتا مىرجاقىپ دۋلات ۇلىنىڭ 140 جىلدىعىنا ارنالعان جاس وقىرماندار بايقاۋىن ۇيىمداستىرۋدى كوزدەپ وتىر. بايقاۋ جەڭىمپازدارى الاش كوسەمدەرىنىڭ كىندىك قانى تامعان تورعاي ءوڭىرىن ارالاپ, احمەت بايتۇرسىن ۇلىنىڭ سارتۇبەكتەگى كەسەنەسىنە, بيدايىقتاعى مىرجاقىپ دۋلات ۇلىنىڭ مۋزەيى مەن كەسەنەسىنە سوعاتىن بولادى.
قوستاناي وبلىسى