وتكەن جىلدىڭ 4 جەلتوقسانىندا «اق جول» دەموكراتيالىق پارتياسىنىڭ توراعاسى ازات پەرۋاشەۆ كاسىپكەرلىككە قاتىستى ايىپپۇل ماسەلەسىن تالقىلاۋ كەزىندە ەلىمىزدىڭ «شترافستانعا» اينالىپ بارا جاتقانىن ايتقان بولاتىن, دەپ جازادى Egemen.kz.
ال كۇنى كەشە پرەزيدەنت قاسىم-جومارت توقاەۆ ماجبۇرلەۋ شارالارى بولماسا, ءتارتىپ ورناتۋ مۇمكىن ەمەس ەكەنىن الەمدىك تاجىريبە كورسەتىپ وتىرعانىن ايتا كەلە, ەلىمىزدى مازاق ەتۋگە بەيىم بولۋ ارەكەتتەرىن سىنادى. مەملەكەت باسشىسى وسىنداي توپ اراسىندا ءوزىن قوعام بەلسەندىسى سانايتىندار, شوۋ-بيزنەس وكىلدەرىمەن قاتار دەپۋتاتتار دا بار ەكەنىن اتاپ ءوتتى.
ماجىلىستە «سىزدەر شترافستان قۇرىپ جاتىرسىزدار» دەگەن ازات پەرۋاشەۆ ءساتسىز تەرمين قولدانعانىن مويىنداپ, ساباق العانىن ايتتى.
«مەن قاسىم-جومارت كەمەل ۇلىنىڭ پىكىرىمەن كەلىسەمىن. ءبىز وتانىمىزدى سۇيەمىز. ول تۋرالى ايتقان كەزدە وزگەلەردىڭ قالاي قابىلدايتىنىن ەسكەرۋىمىز كەرەك. كەي ماسەلەلەردى شەشۋ ءۇشىن ايتقاندارىمىز مەمگە اينالىپ جاتادى. ءساتسىز تەرمين قولدانعانىمدى تۇسىنەمىن. ودان ساباق الدىم. پارلامەنتتە وتىرعاننان كەيىن رەسمي تىلدە سويلەۋىمىز كەرەك», دەدى ازات پەرۋاشەۆ.