سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ دەپۋتاتتارى عىلىم قالالارىن دامىتۋعا ارنالعان كەڭەيتىلگەن وتىرىس وتكىزدى. وندا عىلىم جانە جوعارى ءبىلىم مينيسترلىگى ازىرلەگەن عىلىم قالالارىن قالىپتاستىرۋ جانە دامىتۋ تۇجىرىمداماسىنىڭ جوباسىنا كۋرچاتوۆ قالاسىن قوسۋ مۇمكىندىگى باستى نازاردا بولدى.
كوميتەت توراعاسى اندرەي لۋكين تۇجىرىمداما جوباسىندا الماتى وبلىسىنداعى «الاتاۋ «يتپ» اەا اياسىندا قاناتقاقتى الاڭ رەتىندە تاڭدالعانىن اتاپ ءوتتى. الايدا دەپۋتاتتىڭ ايتۋىنشا, مۇنداي جوبانى جۇزەگە اسىرۋدا كۋرچاتوۆ قالاسىنىڭ ەرەكشە ارتىقشىلىعى بار.
ء«بىزدىڭ كوميتەت وتكەن جىلدىڭ سوڭىندا كۋرچاتوۆ قالاسى مەن ۇلتتىق يادرولىق ورتالىقتىڭ نىساندارىن ارالادى. يادرولىق ورتالىق – كۋرچاتوۆ قالاسىندا قالا نەگىزىن قۇرايتىن كاسىپورىن. بۇگىنگى تاڭدا كۋرچاتوۆ ەلىمىزدەگى نەگىزىنەن عىلىمي ۇيىمدار شوعىرلانعان جالعىز مونوقالا بولىپ وتىر, سونىمەن قاتار ول بۇرىنعى سىناق پوليگونى اۋماعىنىڭ اكىمشىلىك ورتالىعى قىزمەتىن اتقارادى. يادرولىق ورتالىقتىڭ قىزمەتىمەن تانىسا وتىرىپ, ءبىز ونىڭ اۋماعىندا الەمدە تەڭدەسى جوق كوپتەگەن عىلىمي قوندىرعىلاردىڭ ورنالاسقانىنا كوز جەتكىزدىك. ءبىزدىڭ عالىمدار باسقا ەلدەردەگى – فرانتسيا, جاپونيا جانە رەسەيدەگى ارىپتەستەرىمەن قاتار يادرولىق رەاكتور جاساۋشىلاردىڭ قاتارىندا سانالادى. ەڭ باستىسى, ولار مۇندا عىلىمنان اقشا تابۋدى ۇيرەندى. دەمەك, باسقاشا ايتقاندا, الەمدىك دەڭگەيدە عىلىم دا, ماماندار دا, جابدىقتار دا, كوممەرتسيالىق پايدا دا بار», دەپ اتاپ ءوتتى ا.لۋكين.
پارلامەنتشىلەر سونىمەن قاتار قالانىڭ ەكونوميكالىق بەلسەندى حالقىنىڭ 25%-دان استامى عىلىممەن اينالىساتىنىن, ال جۇمىس ىستەپ تۇرعان عىلىمي كاسىپورىندار پايدا اكەلەتىنىن اتاپ ءوتتى.
ء«بىزدىڭ كوميتەت كۋرچاتوۆ قالاسىندا وتكەن كوشپەلى وتىرىستىڭ قورىتىندىسى بويىنشا ۇكىمەتكە كۋرچاتوۆ قالاسىنا عىلىم قالاشىعى مارتەبەسىن بەرۋ تۋرالى ۇسىنىمدار مەن دەپۋتاتتىق ساۋال جولدادى. سونداي-اق ۇكىمەتتەن «عىلىمدى قاجەتسىنەتىن اۋماقتار تۋرالى» ارنايى زاڭنىڭ قابىلدانۋىن قولداۋدى سۇرادى. ۇكىمەت ءوز جاۋابىندا دەپۋتاتتىق ساۋالدا كوتەرىلگەن ماسەلە مۇددەلى مەملەكەتتىك ورگاندارمەن پىسىقتالىپ جاتقانىن حابارلادى جانە قاراۋ ناتيجەسى تۋرالى دەپۋتاتتاردى قوسىمشا حاباردار ەتۋگە ۋادە بەرگەن بولاتىن. الايدا بۇگىنگە دەيىن ەشقانداي قوسىمشا اقپارات العان جوقپىز. سونداي-اق قوعامدا ستراتەگيالىق سيپاتتاعى دەپ ايتۋعا بولاتىن, ياعني عىلىم قالاسىن تاڭداۋ ماسەلەسى تۋرالى جوسپاردىڭ كەڭىنەن تالقىلانۋى دا بايقالمادى. وسىعان بايلانىستى ءبىز بۇگىن بارلىق تاراپتىڭ وي-پىكىرىن تىڭداۋعا جانە كۋرچاتوۆ قالاسىندا العاشقى جوبانى ىسكە اسىرۋ جونىندە تۇجىرىمداما جوباسىنا تولىقتىرۋلار ەنگىزۋ مۇمكىندىگىن تالقىلاۋ ءۇشىن مۇددەلى تاراپتاردى شاقىرىپ وتىرمىز», دەدى ا.لۋكين.
قاتىسۋشىلار وتىرىس قورىتىندىسى بويىنشا العاشقى الاڭ رەتىندە كۋرچاتوۆ قالاسىن قوسۋ ءۇشىن تۇجىرىمداماعا تولىقتىرۋ ەنگىزۋ تۋرالى ۇكىمەتكە ۇسىنىم جىبەرۋ, سونداي-اق عىلىمدى قاجەتسىنەتىن اۋماقتار تۋرالى زاڭ جوباسىن قاراۋدى جەدەلدەتۋ تۋرالى شەشىم قابىلدادى.