وقۋ-اعارتۋ مينيسترلىگىنىڭ تاراتقان اقپاراتىنا سۇيەنسەك, شەتەلدىك بەلدى جوعارى وقۋ ورنىنىڭ گرانتىن ولجالاعان وقۋشى بۇگىندە نازارباەۆ زياتكەرلىك مەكتەبىندە ءبىلىم الىپ ءجۇر. ەندى مەكتەپتەگى وقۋىن بىتىرگەن سوڭ, ءوزىن شاقىرعان پەنسيلۆانيا ۋنيۆەرسيتەتىندە گرانتتا وقي الادى. اتالعان ۋنيۆەرسيتەت ايۆي ليگاسىنا (Ivy League – امەريكانىڭ جانە الەمنىڭ ەڭ ۇزدىك جوعارى وقۋ ورىندار قاۋىمداستىعى) كىرەدى. قاۋىمداستىق قۇرامىنداعى ءبىلىم وردالارى ونداعى وقىتۋ ساپاسىنىڭ جوعارىلىعىمەن ەرەكشەلەنەدى, قاۋىمداستىقتىڭ قۇرامىندا گارۆارد ۋنيۆەرسيتەتى سەكىلدى بەدەلدى وقۋ وردالارى بار.
ءيمانالىنىڭ روبوتتەحنيكاعا دەگەن قىزىعۋشىلىعى 7-سىنىپتا باستالعان. سونىڭ ىشىندە حالىقارالىق «First Global Challenge» (FGC) بايقاۋىنا قاتىسۋى ونىڭ بۇل باعىتقا دەگەن قۇشتارلىعىن ەسەلەي تۇسكەن. «سينگاپۋرداعى FGC – 2023-تە ينجەنەر بولۋدان بولەك, ماتچتار كەزىندە جۇرگىزۋشى بولدىم جانە روبوتتى باسقاردىم. بۇل سترەسكە توزىمدىلىكتى قاجەت ەتەدى. جارىستا 194 ەلدىڭ اراسىندا ونەر كورسەتىپ, ءبىرىنشى ورىن الدىق. بۇل كوماندانىڭ اۋىزبىرشىلىگى, تاباندىلىعى مەن تىنىمسىز ەڭبەكتىڭ ناتيجەسى ەكەنىن كورسەتتىك», دەيدى ءيمانالى.
ءدال سول ۋاقىتتا قازاقستان قۇراماسى روبوتتەحنيكا بويىنشا ەكىنشى رەت الەم چەمپيونى اتانعان ەدى. دارىندى وقۋشى يننوۆاتسيالىق جوبالاردى ازىرلەۋمەن دە بەلسەندى اينالىسىپ ءجۇر. ماسەلەن, ول ەستۋ قابىلەتى ناشار ادامدارعا ارنالعان اقىلدى ساعات جاساپ شىعاردى. «بۇل ساعات ەستۋ قابىلەتى ناشار ادامدارعا ۆيبراتسيا ارقىلى كۇماندى نەمەسە قاۋىپتى دىبىستار تۋرالى ەسكەرتۋ بەرەدى. مەن مۇقتاج ادامداردىڭ ءومىرىن جاقسارتاتىن تەحنولوگيانى جاساعانىمدى ماقتان تۇتامىن», دەيدى 17 جاستاعى چەمپيون.
ءيمانالى بولاشاقتا ەلىمىزدىڭ تەحنولوگياسى مەن ەكونوميكاسىن دامىتۋعا ۇلەس قوسقىسى كەلەدى. سوندىقتان پەنسيلۆانيا ۋنيۆەرسيتەتىن تاڭداپ وتىرعانىن جەتكىزدى. «Wharton School» بيزنەس مەكتەبى الەمدە ءبىرىنشى ورىندا بولعاندىقتان وسى ۋنيۆەرسيتەتتى تاڭدادىم. ۋنيۆەرسيتەت تەك ءبىلىم بەرىپ قانا قويماي, ستۋدەنتتەردىڭ الەۋمەتتىك ءومىرىن دامىتادى, بۇل ماعان وتە ماڭىزدى. مەن العان ءبىلىمىمدى ءوز ەلىمنىڭ دامۋىنا پايدالانۋ ءۇشىن جوعارى وقۋ ورنىن بىتىرگەننەن كەيىن ەلىمە ورالۋدى جوسپارلاپ وتىرمىن. مەنىڭ وقيعام جاستاردى ءوز ارماندارىنا ۇمتىلۋعا جانە ەشقاشان بەرىلمەۋگە شابىتتاندىرادى دەپ ۇمىتتەنەمىن», دەدى ي.كوكسال.