«استانا وپەرا» ساحناسىندا Nomad Inspiration باعدارلاماسىنىڭ پرەمەراسى ءوتتى. مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلعان كەش بالەتمەيستەر سۇلتانبەك عۇماردىڭ زاماناۋي حورەوگرافيالىق جۇمىستارى مەن «HasSak» ەتنو-فولكلورلىق ءانسامبلىنىڭ بىرەگەي اسپاپتىق مۋزىكاسىن بىرىكتىرگەن ناعىز شىعارماشىلىق تاجىريبەگە اينالدى.
باعدارلاما اياسىندا «HasSak» ءانسامبلىنىڭ مۋزىكاسىنا شىعارىلعان «تويباستار» جانە «ارالىم», سونداي-اق كومپوزيتور حاميت شانعاليەۆتىڭ مۋزىكاسىمەن «الەم» ءنومىرى ورىندالدى. اتالعان كەشتە كورەرمەن «HasSak» ءانسامبلى مۋلتياسپاپشىلارىنىڭ ونەرىنە كۋا بولدى. مۋزىكانتتار تۋىندىلاردى جەكە جانە
ماەسترو رۋسلان ءبايمۋرزيننىڭ جەتەكشىلىگىندەگى «استانا وپەرا» سيمفونيالىق وركەسترىنىڭ سۇيەمەلدەۋىمەن ورىندادى. باعدارلاماعا «حاسساقناما», « ۇلى جىبەك جولى», «زاۋرەن», «اڭساۋ», «ورلەۋ», «تۇران جولبارىسى», «تارتۋ» سەكىلدى شىعارمالار ەنگەن.
«ارالىم», «الەم» جانە «تويباستار» حورەوگرافيالىق نومىرلەرى كورەرمەننىڭ شىنايى ىقىلاسىنا بولەنىپ, ءوزىنىڭ كوركەمدىك مانەرلىلىگىمەن جانە بىرەگەيلىگىمەن ءتانتى ەتتى.
كەشتى «تويباستار» ءنومىرى اشىپ, قازاقتىڭ ۇلتتىق ناقىشتارىن كورسەتىپ, مەرەكەلىك كوڭىل كۇي سىيلادى. جارقىن قويىلىم جاس بيشىلەردىڭ 20 جۇبىن بىرىكتىرىپ, ولاردىڭ كۇردەلى دە كوزتارتارلىق قيمىلدارى زاماناۋي كورنەكى شەشىمدەرمەن ايشىقتالدى. ءداستۇرلى سارىن ديزاينەر داريعا تايشىقوۆانىڭ كوستيۋمدەرىمەن ۇيلەسىم تاۋىپ, نومىرگە ايرىقشا بوياۋ ۇستەدى.
ال «ارالىم» نومىرىندە حورەوگراف ەر ادام بەينەسىن جەرمەن, ايەلدەر بولمىسىن سۋمەن بايلانىستىرىپ, قورشاعان ورتا مەن ادامي قارىم-قاتىناستارعا ۇقىپتى قاراۋ كەرەكتىگىن مەڭزەيدى. «الەم» تۋىندىسىندا ايەلدىڭ وتباسىنىڭ قورعاۋشىسى ءارى تۇتاس قوعامنىڭ ۇيىتقىسى رەتىندەگى بەينەسىن كورسەتەدى. توميريس جانە دومالاق انا سىندى اڭىزعا اينالعان تۇلعالاردان شابىت العان قويىلىم قازاق ايەلدەرىنىڭ دانالىعىن, باتىلدىعى مەن نازىكتىگىن ايشىقتادى. ارتىستەردىڭ كەربەز قيمىلدارى وسىناۋ كوپقىرلىلىقتى جەتكىزىپ, بيگە رامىزدىك ءمان قوستى.
سونىمەن قاتار باعدارلامادا سۇلتانبەك عۇماردىڭ كورەرمەن بۇرىننان ۇناتاتىن, اتاپ ايتساق, «turan» ءانسامبلىنىڭ وڭدەۋىندەگى ا.رايىمقۇلوۆانىڭ مۋزىكاسىنا درامالىق «ماڭگۇرت» جانە «HasSak» ءانسامبلىنىڭ «امانات» كومپوزيتسياسىنا جاساعان ايبارلى «RUH» قويىلىمدارى ۇسىنىلدى.
ايتا كەتەيىك, اتالعان باعدارلاما «استانا وپەرادا» جاس حورەوگرافتاردى بەلسەندى قولداپ جانە دامىتىپ جۇرگەن بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆانىڭ باستاماسىمەن ىسكە اسىپ وتىر.