بۇگىن مەملەكەت باسشىسىنىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتتى. وندا بىرقاتار نەگىزگى الەۋمەتتىك-ەكونوميكالىق ماسەلەلەر قارالدى, دەپ حابارلايدى Egemen.kz.
قر پرەزيدەنتى جانىنداعى قسزي جاھاندىق ەكونوميكا جانە ورنىقتى دامۋ ءبولىمىنىڭ باس ساراپشىسى ەرلان جاكۋپوۆ مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا ودان ءارى دامىتۋ ءۇشىن ايتارلىقتاي الەۋەتى بار كولىك-لوگيستيكا سالاسىنا باسا نازار اۋدارعانىن ەسكە سالدى. اتاپ ايتساق, پرەزيدەنت ەلىمىزدىڭ حالىقارالىق ارەناداعى باسەكەلەستىك ارتىقشىلىقتارىن قامتاماسىز ەتەتىن نەگىزگى فاكتورلاردىڭ ءبىرى رەتىندە ترانسكاسپي ءدالىزىن دامىتۋدىڭ جانە ترانزيتتىك الەۋەتىنىڭ ستراتەگيالىق ماڭىزدىلىعىن اتاپ ءوتتى.
جالپى, ۇكىمەت ۇسىنعان مالىمەتتەر بويىنشا, 2024 جىلى جۇك تاسىمالىنىڭ كولەمى تۇراقتى ءوسىم كورسەتىپ, 10%-عا ءوسىپ, شامامەن 1 ملرد توننانى قۇراعان. اسىرەسە, تاسىمالداۋ كولەمى 2,7 ەسەگە وسكەن ترانسكاسپي باعىتى بويىنشا كونتەينەرلىك تاسىمالداۋ سەكتورىندا ايتارلىقتاي ءوسىم بايقالعان.
ساراپشىنىڭ پىكىرىنشە, بۇل جاھاندىق لوگيستيكالىق تىزبەكتەرگە نەگىز بولاتىن نەگىزگى كولىك ارتەريالارىنىڭ ديناميكالىق دامۋىن كورسەتەدى.
«اتاپ ايتقاندا, بيىل «قازمۇنايگاز» قاشاعان كەن ورنىنان اقتاۋ پورتى ارقىلى باكۋ پورتىنا مۇنايدىڭ ءبىرىنشى ءترانزيتىن ءساتتى جۇزەگە اسىردى, بۇل ەنەرگەتيكالىق باعىتتاردى ارتاراپتاندىرۋداعى ماڭىزدى قادام بولدى. بۇل جوبا ترانسكاسپي باعىتىنىڭ الەۋەتىن نىعايتۋعا جانە جاھاندىق لوگيستيكالىق جەلىنىڭ نەگىزگى ەلەمەنتى رەتىندە ايماقتىڭ ماڭىزدىلىعىن ارتتىرۋعا كومەكتەسەدى.
دۇنيەجۇزىلىك بانكتىڭ بولجامى بويىنشا, 2030 جىلعا قاراي ورتا ءدالىز بويىنشا كاسپي تەڭىزى ارقىلى تاسىمالداۋ كولەمى ءۇش ەسە ارتىپ, 11 ميلليون توننانى قۇرايدى, ونىڭ 4 ميلليون تونناعا جۋىعى كونتەينەرلەردە تاسىمالدانادى. ترانزيتتىك جۇكتەردىڭ نەگىزگى بولىگى ەۋروپا مەن قازاقستان, سونداي-اق ەۋروپا مەن قىتاي اراسىنداعى ساۋدانىڭ ءبىر بولىگى رەتىندە وسى باعىت ارقىلى وتەدى», دەدى ەرلان جاكۋپوۆ.
ەرلان جاكۋپوۆ وسى ءورشىل ماقساتتارعا قول جەتكىزۋ ءۇشىن كولىك ينفراقۇرىلىمىن جەتىلدىرۋدى جالعاستىرۋ قاجەت ەكەندىگىن تىلگە تيەك ەتتى.
«Logistics Performance Index (LPI) رەيتينگىنىڭ «كولىك ينفراقۇرىلىمى» قوسالقى يندەكسىندە قازاقستان 2018 جىلعى باعالاۋمەن سالىستىرعاندا پوزيتسياسى جاقسارىپ, 138 ەلدىڭ اراسىندا 80-ورىنعا يە بولدى (2018 جىلى 81 ورىن). دەگەنمەن, پوزيتسيالاردى ودان ءارى نىعايتۋ جانە جۇك تاسىمالى كولەمىنىڭ ءوسۋىن ىنتالاندىرۋ ءۇشىن ايتارلىقتاي كۇردەلى سالىم قاجەت. ەۋروپالىق قايتا قۇرۋ جانە دامۋ بانكىنىڭ (ەقدب) بولجامدارىنا سايكەس, ورتالىق ازيانىڭ كولىك ينفراقۇرىلىمىن ايتارلىقتاي جاقسارتۋ ءۇشىن قاجەتتى ينۆەستيتسيانىڭ جالپى كولەمى قازاقستان ءۇشىن 5,5 ميلليارد ەۋرونى جانە جالپى ايماق ءۇشىن 18,5 ميلليارد ەۋرونى قۇرايدى», دەدى ە.جاكۋپوۆ.
وسىلايشا, ەرلان جاكۋپوۆ كولىك-لوگيستيكالىق ينفراقۇرىلىمدى ودان ءارى دامىتۋ ەلدىڭ الەمدىك نارىقتاعى باسەكەگە قابىلەتتىلىگىن نىعايتۋدىڭ جانە جاھاندىق ەكونوميكالىق پروتسەستەرگە ينتەگراتسياسىن ارتتىرۋدىڭ نەگىزگى فاكتورى بولاتىنىنا توقتالدى.