قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا اۋىلدى دامىتۋعا ارنالعان نەگىزگى مىندەتتەرگە ارنايى توقتالىپ, ينفراقۇرىلىمدى جاڭعىرتۋعا جانە بيزنەستى قولداۋعا باسىمدىق بەرىلۋى كەرەك ەكەنىن ايتتى, دەپ حابارلايدى Egemen.kz.
پرەزيدەنتتىڭ پىكىرىنشە, اۋىلدىق ايماقتاردى جان-جاقتى دامىتۋعا ارنالعان مەملەكەتتىك قولداۋ شارالارىنىڭ ءبارىن ءبىر باعدارلاماعا بىرىكتىرۋ دۇرىس شەشىم بولماق, ياعني «اۋىل اماناتى», «اۋىل – ەل بەسىگى» جانە تاعى باسقا باعدارلامالار.
«ۇكىمەت پەن اكىمدەردەن جاڭا, جۇيەلى ءارى تىڭ تاسىلدەر كۇتەمىن. جالپى, اۋىل شارۋاشىلىعىندا شەشىلمەگەن ماسەلەلەر از ەمەس. فەرمەرلەر, ساراپشىلار ءتۇرلى تۇيتكىلدەر تۋرالى جازىپ جاتىر. مىسالى, بورداقىلاۋ ورىندارى مالسىز, جارتىلاي بوس تۇر, سەبەبى, مال كورشى ەلدەرگە تومەن باعامەن ساتىلىپ جاتىر. اۋىلداعى اعايىننىڭ تۇرمىس ساپاسىنا ىقپال ەتەتىن بارلىق ماسەلەگە باسا ءمان بەرۋ قاجەت», دەدى قاسىم-جومارت توقاەۆ.
سونىمەن قاتار اۋىل حالقى قارجىلىق جانە مەملەكەتتىك قىزمەتتەردەن قول ءۇزىپ قالماۋى كەرەك ەكەنىن ايتىلدى. ايتا كەتەيىك, قازىر بۇل مىندەت, نەگىزىنەن, «قازپوشتا» ارقىلى ورىندالىپ جاتىر.بۇل رەتتە پرەزيدەنت ۇكىمەتكە اكىمدىكتەرمەن بىرلەسىپ, پوشتا بولىمشەلەرىنىڭ شالعاي ەلدى مەكەندەردە ۇزدىكسىز جۇمىس ىستەۋىن قامتاماسىز ەتۋدى تاپسىردى.