مەملەكەت باسشىسى وتىرىس بارىسىندا ۇكىمەتتىڭ جانە باسقا دا قۇزىرلى ورگانداردىڭ جاقىن اراداعى نەگىزگى مىندەتتەرىنە توقتالدى, دەپ حابارلايدى Egemen.kz.
پرەزيدەنتتىڭ ايتۋىنشا, بىلتىر وڭدەۋ ونەركاسىبى سالاسىندا 180 ينۆەستيتسيالىق جوبا جۇزەگە اسىرىلعان. جوبالاردىڭ جالپى قۇنى – 1,3 تريلليون تەڭگە قۇراعان. ناتيجەسىندە وسى سالاداعى ءوسىم 6 پايىزعا جۋىقتاپ, سوڭعى ون جىلداعى ەڭ جوعارى كورسەتكىشتى كورسەتكەن. بۇل رەتتە, قاسىم-جومارت توقاەۆ وسى جاقسى ءۇردىستى ءبىرجولا ورنىقتىرىپ, ساقتاپ قالۋ كەرەكتىگىن باسا ايتتى.
«تاعى ءبىر اسا ماڭىزدى ماسەلە – ەكونوميكاعا ينۆەستيتسيا تارتۋ. بۇۇ مالىمەتتەرىنە سايكەس, قازاقستان بۇل كورسەتكىش بويىنشا ايتارلىقتاي تابىسقا قول جەتكىزگەن. دەگەنمەن توقمەيىلسۋگە نەگىز جوق. ينۆەستورلاردىڭ ماسەلەسىن شۇعىل شەشۋ ءۇشىن ينۆەستيتسيا شتابى قۇرىلدى. سونىڭ ارقاسىندا بيۋروكراتيالىق كەدەرگىلەر مەن قۇقىقتىق قاراما-قايشىلىقتار جويىلىپ, كەيبىر جوبالاردى تەزىرەك جۇزەگە اسىرۋعا جول اشىلدى. الايدا باستى ماقسات – «جەكەلەگەن» پروبلەمالاردى عانا شەشپەي, ەلدەگى تۇتاس ينۆەستيتسيالىق احۋالدى جاقسارتۋ», دەدى مەملەكەت باسشىسى.
سونداي-اق, پرەزيدەنت ينۆەستيتسيالىق جوبالاردى ازىرلەۋ بارىسىندا ۆەدومستۆوارالىق ۇيلەستىرۋگە ءالى دە كوپ ۋاقىت كەتەتىنىڭ تىلگە تيەك ەتتى.
«ۇكىمەت باسى ارتىق بيۋروكراتيادان ارىلىپ, جەدەل جۇمىس ىستەۋى كەرەك. مەملەكەتتىك قىزمەتشىلەردىڭ ق ۇلىقسىزدىعى جانە جاۋاپكەرشىلىك الۋدان تايسالۋى كەلىسۋ راسىمدەرى مەن شەشىم قابىلداۋدىڭ تىم ۇزاققا سوزىلۋىنا سەبەپ بولىپ وتىر. مۇنى اشىق ايتقان ابزال», دەدى قاسىم-جومارت توقاەۆ.