مەملەكەتتىك ورتالىق مۋزەيدە كورنەكتى سۋرەتشى, ەتنوگراف, ولكەتانۋشى, تۇركىستان ارحەولوگيا اۋەسقويلارى ۇيىرمەسىنىڭ مۇشەسى, ورىس گەوگرافيالىق قوعامى جەتىسۋ ءبولىمىنىڭ نەگىزىن قالاۋشى ن. حلۋدوۆتىڭ 175 جىلدىعىنا وراي «دالا بوياۋلارى» اتتى كورمە اشىلدى, دەپ حابارلايدى Egemen.kz.
شارانى قر مەملەكەتتىك ورتالىق مۋزەيى ديرەكتورىنىڭ مىندەتىن اتقارۋشى عاليا تەمىرتون اشىپ: ء«داستۇر مەن ادەت-عۇرىپتى بەرىك ۇستانۋ, ۇرپاقتار ساباقتاستىعىن ءوربىتۋ قاشاندا قازاق حالقىنا ءتان قاسيەت بولعان. قازاقتىڭ وسىنداي وزىندىك كەلبەتىن بەينەلەپ, ارتىندا وشپەس مۇرا قالدىرعان دارىندى سۋرەتشى ن. حلۋدوۆتىڭ شىعارمالارى ورتالىق مۋزەي قورىنىڭ باي قازىناسى دەۋگە تولىق نەگىز بار», دەپ اتاپ ءوتتى.
كورمەنىڭ اشىلۋ سالتاناتىنا قاتىسقان بەلگىلى ەتنوگراف احمەت توقتاباي, قازاقستان سۋرەتشىلەر وداعىنىڭ توراعاسى ومىربەك جۇبانيازوۆ, باسقا دا ونەرتانۋشىلار داڭقتى سۋرەتشىنىڭ XIX عاسىر مەن XX عاسىردىڭ باسىنداعى قازاق حالقىنىڭ ءداستۇرلى مادەنيەتىن, تۇرمىسىن, شارۋاشىلىعىن بەينەلەۋگە ايتۋلى ەڭبەك سىڭىرگەنىنە توقتالدى.
ن.حلۋدوۆ مۇراسىنىڭ ەڭ ماڭىزدى بولىگى (211 جۇمىسى) قر مەملەكەتتىك ورتالىق مۋزەيىنىڭ قورىندا ساقتاۋلى. ونىڭ ىشىندە 117 كەسكىندەمە, 39 قارىنداشپەن سالىنعان ەسكيز, 55 اكۆارەل جۇمىسى جانە 3 البوم بار. سۋرەتشىنىڭ «نوسەر جاۋىن استىنداعى كوش», «بارىمتا», «بيە ساۋ», «ورمەك باسىنداعى توقىماشى», «سالتاناتتى كوش», «الاۋ جانىنداعى ايەل» تۋىندىلارى كوپشىلىككە ەتەنە تانىس.
كورمە ەكسپوزيتسياسىنا ن.گ.حلۋدوۆ قىلقالامىنان تۋعان شىعارمالارمەن قاتار جەكە زاتتارى (جيھازدارى, فوتواپپاراتى, ولشەۋ قۇرالدارى جانە ت.ب.) مەن فوتوقۇجاتتىق ماتەريالدار دا قويىلدى. كورمەنىڭ باستى ەرەكشەلىگى – العاش رەت سۋرەتشى ن.حلۋدوۆتىڭ اكۆارەلدى جۇمىستارى جانە قارىنداشپەن سالىنعان ەسكيزدەردەن تۇراتىن ءۇش البومى قويىلىپ, اتالعان البومداردىڭ ەلەكتوروندى نۇسقاسى كوپشىلىك نازارىنا ۇسىنىلدى.
ەستە بولسا, 2003 جىلى ورتالىق مۋزەي العاش رەت سۋرەتشىنىڭ ءوز كوللەكتسياسىنداعى تۋىندىلارىنان كاتالوگ-البوم جارىققا شىعارىپ, كورەرمەنگە ۇسىنعان بولاتىن. كورمە 2025 جىلدىڭ 25 اقپانىنا دەيىن جالعاسادى.