داۋىردەن سىر شەرتكەن دۇنيەلەر

بىرماعامبەت ال­دياروۆ – قوستاناي وكرۋگى قارابالىق اۋدانىنىڭ №10 اۋىلىندا تۇرعان. 1927 جىلى سول جەردەن تاركىلەۋگە ىلىككەن. بىراق ول كىسىنىڭ كەيىنگى ءومىرى بەيمالىم. الايدا داۋ­لەتتى وتباسىنىڭ تۇتىنعان زاتتارىنان حالقىمىزدىڭ عاجايىپ مۇراسىن كورەمىز.

ماسەلەن, قىزىل بارقىتتان التىنمەن ادىپتەلىپ تىگىلگەن قازاق ايەلىنىڭ قامزولى قانداي ادەمى. ويۋ-ورنەگى دە ەرەكشە. استارى ماقتا-ماتادان جاسالعان. قالتالارى كوكشىل بارقىتتان تىگىلگەن. بىراق قامزولدىڭ ماتاسى ۋاقىت وتە كەلە توزىپتى. سو­دان كەيىن ونى 1994 جىلى حالىق شەبەرى تۇرسىنكۇل جاي­لاۋباەۆا قايتادان قالپىنا كەلتىرگەن. ايتا كەتەيىك, مۇنى بىرماعامبەت بايدىڭ بايبىشەسى كيگەن. سونداي-اق بۇحارانىڭ قىمبات ماتاسى – قامقادان تىگىلگەن ەر ادامعا ارنالعان شاپان دا وزگەشە. ونى التىن سارعىش ءتۇستى مەتالل جىپپەن زەرلەگەن. شاپاننىڭ قىزىل كۇرەڭ ءتۇستى گۇلدەرى دە كوركەم. ءوڭىرى مەن جەڭى ءتۇستى توقىما باۋمەن ادىپتەلىپ, استارىن بۇحارانىڭ جىبەگىمەن جاساعان. وكىنىشتىسى, قازىر شاپاننىڭ ماتەريالى ابدەن توزعان. قايتا جاڭعىرتۋ قاجەت.

اسىرەسە توبەسى بيىك, ەتەگى كەڭ ايىر قالپاق ايرىقشا. ونىڭ قايىرماسىنداعى جو­عارعى بولىكتىڭ ەتەگىنە سىزىق سالىپ قوندىرعان. ەتەگى اق كيىزدەن تىگىلىپ, ەكى جاعى ايىر­لانىپ كەلگەن. تولىعىمەن التىندالعان جىپپەن زەرلەنگەن. بۇرىن ەرلەرمەن بىرگە ايەلدەر دە اتقا ءمىندى. بىراق شەبەرلەر ەر-توقىمدى ايەلدەرگە بولەك جاساعان. بۇل – ايەلدەرگە ارنالعان سونداي ەر-توقىمنىڭ ءبىرى. ەردىڭ نەگىزى اعاشتان جاسالىپ, تەرىمەن قاپتالعان. الدىڭعى قاسى ارتقى قاسىنان بيىكتەۋ, ارتقى قاسى جالپاقتاۋ. ەردىڭ الدىڭعى بيىك قاسىنا كۇمىستەن جاپسىرما بەكىتىلگەن. ونى وسىمدىك تەكتەس ويۋ-ورنەكتەرمەن جۇرگىزگەن. كۇمىستىڭ بەتىنە قىزعىلت سارى ءۇش اقىق جانە كوگىلدىر ءتۇستى پەرۋزالار قوندىرعان. ەر-توقىم جاقسى ساقتالعان. كوزگە بىردەن تۇسەدى.

قازىر بۇل جادىگەرلەرگە عاسىردان اسا ۋاقىت بولدى. بىراق ونى كورگەندەرگە سول داۋىردەن سىر شەرتكەندەي اسەر بەرەدى.