الماتىدا 15 جاستاعى ءجاسوسپىرىمدى قاعىپ كەتكەن جۇرگىزۋشىگە قاتىستى سوت ۇكىمى شىقتى, دەپ حابارلايدى Egemen.kz جوعارعى سوتتىڭ ءباسپاسوز قىزمەتىنە سىلتەمە جاساپ.
بۇرىن 2020 جىلى جەتى جىلعا كولىك جۇرگىزۋ قۇقىعىنان ايىرىلعان الماتى قالاسىنىڭ تۇرعىنى تاعى دا ماس كۇيىندە كولىك جۇرگىزگەن. جاياۋ جۇرگىنشىلەر وتكەلىندە ول كامەلەتكە تولماعان ءجاسوسپىرىمدى قاعىپ كەتكەن, ونى تەك ارتقى كورىنىس ايناسىنان بايقاعان. الايدا, پوليتسيا قىزمەتكەرلەرى كەلگەنگە دەيىن ول وقيعا بولعان جەردەن كەتىپ, كەيىن دوستارىمەن سىرا ءىشىپ, ۇيىنە ورالعان. سالدارىنان 15 جاستاعى ءجاسوسپىرىم العان جاراقاتتارىنان قايتىس بولعان.
«الماتى قالالىق قىلمىستىق ىستەر جونىندەگى سوتىندا ابايسىزدا ادام ولىمىنە اكەپ سوققان كولىك قۇرالىن ماس كۇيىندە جۇرگىزگەن (قر قك-ءنىڭ 346-بابىنىڭ 5-بولىگى) جانە اۋىر زارداپتارعا اكەپ سوققان جول-كولىك وقيعاسى ورنىن تاستاپ كەتكەن (قر قك 347-بابى) ايىپتالۋشىعا قاتىستى ءىس قارالدى. قر قك-ءنىڭ 346-بابىنىڭ 5-بولىگى بويىنشا جازا كولىك قۇرالدارىن باسقارۋ قۇقىعىنان ءومىر بويىنا ايىرۋمەن 7 جىلدان 9 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى قاراستىرادى. قك-ءنىڭ 347-بابى بويىنشا – 1000 اەك-كە دەيىنگى مولشەردە ايىپپۇل سالۋعا, نە سول مولشەردە تۇزەۋ جۇمىستارىنا, نە 600 ساعاتقا دەيىن قوعامدىق جۇمىستارعا تارتۋعا, نە 3 جىلعا كولىك قۇرالىن باسقارۋ قۇقىعىنان ايىرا وتىرىپ, 2 جىلعا دەيىنگى مەرزىمگە باس بوستاندىعىن شەكتەۋگە نەمەسە سول مەرزىمگە باس بوستاندىعىنان ايىرۋعا جازالانادى», دەلىنگەن حابارلامادا.
سوتتالۋشى ءوز كىناسىن تولىق مويىنداپ, سوتتان جەڭىلدىك جاساۋدى سۇراعان. ونىڭ كىناسى ءىس ماتەريالدارىمەن, سونىڭ ىشىندە سوت-مەديتسينالىق جانە سوت-ناركولوگيالىق ساراپتامالارىنىڭ قورىتىندىلارىمەن راستالعان.
سوت ايىپتالۋشىنى ءومىر بويىنا كولىك جۇرگىزۋ قۇقىعىنان ايىرۋ ارقىلى 7 جىلعا باس بوستاندىعىنان ايىرۋعا ۇكىم شىعاردى. سونداي-اق جابىرلەنۋشى تاراپقا 14 ملن تەڭگە كولەمىندە ماتەريالدىق جانە مورالدىق شىعىندى وتەۋگە مىندەتتەلدى.ۇكىم زاڭدى كۇشىنە ەندى.