مەملەكەت جەكەمەنشىك مەكتەپتەردىڭ باستاۋىش سىنىپ وقۋشىلارىن تەگىن تاماقتاندىرۋدى قامتاماسىز ەتۋ ءۇشىن 12 ميللياردتان استام تەڭگە ءبولدى. جاڭا باستاما 25 مىڭنان استام بالانى قامتيدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.
جەكەمەنشىك مەكتەپتەردە وقيتىن از قامتىلعان وتباسىلاردىڭ بالالارىنا الەۋمەتتىك كومەك كورسەتۋ بيىلعى جىلدان باستالادى. 30 جەلتوقساندا پرەزيدەنت ءبىلىم جانە بالا قۇقىقتارىن قورعاۋ ماسەلەلەرى جونىندەگى زاڭعا قول قويدى.
زاڭ مەملەكەتتىك ءبىلىم بەرۋ تاپسىرىسى بويىنشا وقيتىن وقۋشىلار ءۇشىن الەۋمەتتىك قولداۋ شارالارىن كەڭەيتۋدى كوزدەيدى. بۇرىن «جالپىعا بiردەي ءبىلىم بەرۋ» قورىنان مەكتەپ كەرەك-جاراقتارى مەن كەڭسە تاۋارلارىن ساتىپ الۋعا كومەك تەك مەملەكەتتiك مەكتەپ وقۋشىلارىنا عانا كورسەتiلگەن بولسا, ەندى جەكەمەنشىك مەكتەپ وقۋشىلارىنا دا قاتىستى بولادى.
«جاڭا زاڭ اياسىندا جەرگىلىكتى اتقارۋشى ورگاندارعا مەنشىك نىسانىنا قاراماستان, الەۋمەتتىك وسال وتباسىلاردىڭ بالالارىنا الەۋمەتتىك كومەك كورسەتۋ قۇزىرەتى بەرىلەدى. بۇل بارلىق بالالار ءۇشىن تەڭ مۇمكىندىكتەردى قامتاماسىز ەتۋگە باعىتتالعان ماڭىزدى قادام», دەدى قر وقۋ-اعارتۋ ءمينيسترى عاني بەيسەمباەۆ.ايتا كەتەيىك, مەملەكەت باسشىسىنىڭ تاپسىرماسى بويىنشا 2023 جىلدىڭ قىركۇيەگىنەن باستاپ باستاۋىش سىنىپ وقۋشىلارى مەن الەۋمەتتىك ساناتتاعى 5-11 سىنىپ وقۋشىلارى ءۇشىن مەملەكەتتىك مەكتەپتەردە تەگىن ىستىق تاماق ۇيىمداستىرىلدى.
بيىلعى وقۋ جىلىندا مەملەكەتتىك مەكتەپتەردە وقيتىن 1,7 ملن-نان استام بالا تەگىن تاماقپەن قامتاماسىز ەتىلگەن. «جالپىعا بىردەي ءبىلىم بەرۋ» قورى اياسىندا 510 مىڭ وقۋشىنى قۇرال-جابدىقتارمەن قامتاماسىز ەتۋگە قوسىمشا 22,5 ملرد تەڭگە بولىنگەن.