«ناۋرىز جۇمىسكەر»: جاڭا تۇرعىن ءۇي باعدارلاماسى ىسكە قوسىلدى

باعدارلاما ونەركاسىپ, ەنەرگەتيكا, كولىك, اۋىل شارۋاشىلىعى جانە سۋ رەسۋرستارى سالالارىنىڭ قىزمەتكەرلەرىن باسپانامەن قامتۋعا باعىتتالعان. 

بيىل «ناۋرىز جۇمىسكەر» باعدارلاماسى اياسىندا جۇمىسشى ماماندىقتارى وكىلدەرىنە 72 ملرد تەڭگە كولەمىندە 2 440 نەسيە بەرىلمەك.  وتىنىمدەردى قابىلداۋ 2025 جىلدىڭ 17 ناۋرىزىنا جوسپارلانعان. «ناۋرىز جۇمىسكەر» «ناۋرىز» تۇرعىن ءۇي باعدارلاماسىنىڭ ءبىر بولىگى بولماق.   «باعدارلاما تالاپتارى بويىنشا ازاماتتاردىڭ الەۋمەتتىك وسال ساناتتارى ءۇشىن 7% (جتسم 7,1%-دان 9,6%-عا دەيىن) جانە قالعان بارلىق ساناتتار ءۇشىن 9% (جتسم 9,4%-دان 13%-عا دەيىن) مولشەرلەمەمەن نەسيە بەرىلەدى. باستاپقى جارنا – تازا ارلەۋدەگى باستاپقى تۇرعىن ءۇيدى ساتىپ الۋ ءۇشىن 10 پايىزدان, ارلەنبەگەن باستاپقى تۇرعىن ءۇيدى جانە قايتالاما نارىقتاعى تۇرعىن ءۇيدى ساتىپ الۋ ءۇشىن 20 پايىزدان باستالادى. نەسيەنىڭ ەڭ جوعارى سوماسى وبلىستار ءۇشىن 30 ملن تەڭگە, استانا مەن الماتى قالالارى ءۇشىن 36 ملن تەڭگە», دەلىنگەن ۇكىمەت حابارلاماسىندا.    وتباسى بانكى «ناۋرىز جۇمىسكەر» باعدارلاماسىمەن قاتار وتاندىق كاسىپورىندارمەن «كورپوراتيۆتىك» ءونىم شەڭبەرىندە جۇمىس ىستەيدى. بۇل كاسىپورىنداردىڭ ءوز قىزمەتكەرلەرىنە نەسيە بەرۋ ءۇشىن قاراجات بولۋىنە ىقپال ەتەدى.