اكىمدىكتەر 40 ملرد تەڭگەگە جۋىق ماقساتتى ترانسفەرتتەردى يگەرە المادى. ونىڭ 93 پايىزدان استامى دامۋ باعدارلامالارىنا بەرىلگەن.
2024 جىلى رەسپۋبليكالىق بيۋدجەتتەن 1,9 ترلن تەڭگە بولىنگەن, ونىڭ 276,4 ملرد-ى – قازىرگى باعدارلامالاردى, 1,5 ترلن-ى – دامۋ باعدارلاماسىن جۇزەگە اسىرۋعا ارنالعان. Finprom مالىمەتىنشە, اكىمدىكتەردىڭ ماقساتتى ترانسفەرتتەردى ورىنداۋ كولەمى 97,9%-دى قۇراعان, سوندا يگەرە الماۋ كورسەتكىشى – 2,1%. پايىزعا قاراساق, سونشالىقتى كوپ ەمەس سەكىلدى, ال سانعا شاقساق – 40 ملرد تەڭگە شىعادى. مۇنى ارينە, از دەپ ايتۋ قيىن.
قاراجاتتى مەيلىنشە تۇگەل جۇمساعان – استانا اكىمدىگى. 88,3 ملن تەڭگە ارتىلعان, تيىسىنشە ول بيۋجەتتى ۇنەمدەۋگە قاتىستى. شىعىس قازاقستان وبلىسى 99,9%-عا يگەرگەن. دىتتەگەن ماقساتىنا جەتپەگەن قارجى كولەمى – 69,8 ملن تەڭگە, ونىڭ 8,1 ملن-ى – ۇنەمدەۋ, 61,7 ملن-ى – يگەرىلمەۋ. قىزىلوردا وبلىسىنداعى ارتىلعان قاراجات كولەمى – 120,8 ملن تەڭگە, ونىڭ 36,6 ملن تەڭگەسى ۇنەمدەۋگە قاتىستى بولسا, 84,3 ملن تەڭگەسى يگەرىلمەي قالعان. ۇزدىك بەستىك قاتارىنا تۇركىستان وبلىسى مەن شىمكەنت كىرگەن. ولارداعى يگەرۋ ۇلەسى – 99,8%.
اۋتسايدەرلەر: ماڭعىستاۋ وبلىسى – بولىنگەن قارجىنىڭ 85,1%-ى يگەرىلگەن (16,9 ملرد تەڭگە جۇمسالماعان); اتىراۋ وبلىسى – 94,2% (4,2 ملرد تەڭگە يگەرىلمەگەن); اقمولا وبلىسى – 97,2% (3,5 ملرد تەڭگە يگەرىلمەگەن). 20 ولكەنىڭ توعىزىندا يگەرىلمەگەن قارجى كولەمى 1 ملرد تەڭگەدەن اسىپ تۇسكەن.
«بۇل ايتارلىقتاي پروبلەما. سەبەبى قاراجاتتىڭ بارلىعى دەرلىك حالىقتىڭ ءومىر ساپاسىن جاقسارتاتىن ءارتۇرلى جوبالارعا باعىتتالۋعا ءتيىس ەدى. الايدا ءتۇرلى سەبەپپەن بۇل ماقسات ورىندالمادى», دەيدى Finprom ساراپشىلارى.