قوستانايدا ءبىر كۇندە ەكى بىردەي جايلى مەكتەپ پايدالانۋعا بەرىلدى. كەيىنگى جىلدارى بوي كوتەرگەن «بەرەكە», «اەروپورت» شاعىن اۋداندارىندا اشىلعان ءبىلىم وردالارىندا 2100 بالا قازاق تىلىندە ءبىلىم الاتىن بولادى.
جايلى مەكتەپتەردىڭ اشىلۋ سالتاناتىنا وبلىس اكىمى قۇمار اقساقالوۆ, «Samruk-Kazyna Construction» اق باسقارما توراعاسىنىڭ ءبىرىنشى ورىنباسارى عابيت مالعازداروۆ, ءبىلىم سالاسىنىڭ باسشىلارى, اتا-انالار مەن وقۋشىلار قاتىستى.
«بەرەكە» شاعىن اۋدانىندا جيىرما مىڭعا جۋىق حالىق تۇرادى. بالالاردىڭ ساپالى ءبىلىم الۋىنا جان-جاقتى جاعداي جاسالىپ, ءبىلىم ورداسى ارنايى قۇرىلعىلارمەن جابدىقتالدى. ۇلى اعارتۋشى, عالىمدار مەكەنى توبىل-تورعاي جەرىندە ۇلى جوبالاردىڭ ءارى قاراي جالعاساتىنىنا سەنىمدىمىز. ساپالى ءبىلىم جانە وسكەلەڭ ۇرپاقتى تاربيەلەۋ ەلىمىزدىڭ باستى قۇندىلىقتارى. پرەزيدەنت ساياساتىنىڭ ارقاسىندا ەلىمىزدە ساپالى ءبىلىم الۋ ءۇشىن قولايلى جاعداي جاسالىپ, وتكەن جىلى 1200 ورىندىق ەكى مەكتەپ سالىندى. بيىل ءتورت جارىم مىڭ ورىندى قامتيتىن جەتى مەكتەپتىڭ قۇرىلىسى اياقتالادى. وسىنداي ماڭىزدى الەۋمەتتىك نىسانداردىڭ ناتيجەسىندە وبلىستاعى وقۋ ورىندارىنىڭ تاپشىلىعى بىرتىندەپ شەشىلىپ كەلەدى. وبلىستىڭ ءبىلىم سالاسى كوپتەگەن جەتىستىككە جەتتى. ءوڭىرىمىز رەسپۋبليكالىق پاندىك وليمپيادادان ءۇشىنشى ورىندا, حالىقارالىق بايقاۋلاردا الدىڭعى قاتاردامىز. بۇل جەردە وسى قابىلەتتەرىڭىزدى ودان ءارى شىڭداپ, ۇلكەن ارماندارعا جول اشىلعالى تۇر», دەدى اكىم.
«بەرەكە» شاعىن اۋدانىنىڭ تۇرعىنى ەرمەك قالقاەۆا جاڭا مەكتەپكە ەكى بىردەي نەمەرەسىن جەتەكتەپ اكەلىپتى. كەزىندە ناۋىرزىم اۋدانىندا, كەيىن قوستانايدا مۇعالىمدىك قىزمەت اتقارعان ارداگەر ۇستاز بالاعا ءوز انا تىلىندە ءبىلىم بەرۋدىڭ ماڭىزدى ەكەنىن جاقسى بىلەدى.
«جاڭا مەكتەپ بىزگە ۇنادى. ۇلتتىق سيپاتتا تاربيە, ءبىلىم بەرەدى ءارى وزىمىزگە جايلى. جانىمىزدا ورنالاسقان. ءىشى جارىق, بولمەلەرى كەڭ, جاقسى جابدىقتالعان. بالالاردىڭ ساپالى ءبىلىم الۋىنا جاعداي جاسالعان. سانالى تاربيە الىپ شىعاتىنىنا سەنەمىز. ءوزىم دە ۇستاز بولعانمىن. قىرىق جىلعا جۋىق ۋاقىت ماتەماتيكا پانىنەن ساباق بەردىم. ءالى مەكتەپتەن كەتكەن جوقپىن. نەمەرەلەرىمدى وقىتامىن. سەگىز نەمەرەم بار. قازىرگى باعدارلامادا بۇرىنعىدان ايىرماشىلىق كوپ. جاڭاشا ۇيرەتۋگە, جاڭاشا تاربيەلەۋگە تىرىسامىز. ءار اتا-انانىڭ ارمانى – بالالارىنىڭ ءبىلىم الىپ ۇلكەن ازامات بولعانى», دەيدى ارداگەر ۇستاز.
بۇعان دەيىن ورىس-قازاق سىنىپتارى ارالاس مەكتەپتەردە وقىپ كەلگەن ءبىرسىپىرا بالا ەندى تازا قازاق تىلىندە ءبىلىم بەرەتىن وسى مەكتەپكە قابىلداناتىن بولادى. «بەرەكە» شاعىن اۋدانىنىڭ تۇرعىنى ءدامىر احتياموۆ تا بالالارىن ءۇي ىرگەسىندە اشىلعان جاڭا مەكتەپكە بەرىپ جاتىر.
«بۇل مەكتەپ وسى جەردەگى تۇرعىندار ءۇشىن جايلى دەپ ويلايمىن. وسىنىڭ الدىندا قىزىمىز №27 مەكتەپتە وقىپ ەدى. ول بىزگە الىس. ال جاڭا مەكتەپ جانىمىزدا تۇر ءارى ءىشى جارىق, كەڭ, وقۋعا ساي زاماناۋي ۇلگىدە جابدىقتالعان. ەڭ باستىسى, ۇيگە جاقىن, بالا دا شارشامايدى, ءبىز دە ۋاقىت ۇنەمدەيمىز. بۇرىن ەكىنشى بالام اباي مەكتەبىندە وقىدى. كەيدە ساباعىنا جالعىز جىبەرۋگە تۋرا كەلەدى. سونداي كەزدەردە جولدىڭ ارعى بەتىنە قالاي ءوتتى ەكەن دەپ الاڭداپ وتىراتىنبىز. قازىر مەكتەبىمىز ۇيگە ءتيىپ تۇر. سوندىقتان پرەزيدەنتىمىزدىڭ باستاماسىمەن سالىنعان جايلى مەكتەپتەر بالاعا عانا ەمەس, اتا-انالارعا دا اسا قولايلى», دەيدى تۇرعىن.
جاڭا شاعىن اۋداندارداعى جايلى مەكتەپتەردىڭ قۇرىلىسىنا رەسپۋبليكا بيۋدجەتىنەن 14 ملرد تەڭگە قارجى بولىنگەن. وبلىستىق ءبىلىم باسقارماسىنىڭ مالىمەتىنشە, بيىل وڭىردە 4,5 مىڭ بالا ءبىلىم الاتىن تاعى 7 مەكتەپ سالىنادى.
قوستاناي وبلىسى