ادام ءولتىرۋ, تۇرعىنجايعا قولسۇعىلماۋشىلىقتى بۇزۋ جانە زاڭسىز قارۋ اينالىمى ءۇشىن قىلمىستىق جاۋاپتىلىققا تارتۋ ماقساتىندا قازاقستاننىڭ ەكى ازاماتى رەسەيدەن ەكستراديتسيالاندى, دەپ حابارلايدى Egemen.kz باس پروكۋراتۋرانىڭ ءباسپاسوز قىزمەتىنە سىلتەمە جاساپ.
انىقتالعانداي, كۇدىكتىلەر 2023 جىلدىڭ قاڭتارىندا شىمكەنت قالاسىندا باسقا ءۇش اداممەن بىرلەسىپ, جەكە ارازدىق نەگىزىندە تانىسىن ءولتىرۋدى جوسپارلاعان.
«ويلارىن جۇزەگە اسىرۋ ماقساتىندا كۇدىكتىلەر تاپانشا, مەتالل شىبىقتار جانە بيتالارمەن قارۋلانىپ, قولعاپ پەن ماسكا كيىپ, تۇنگى ۋاقىتتا جابىرلەنۋشىنىڭ ۇيىنە كەلگەن. ولار تەرەزەلەردى سىندىرىپ, ۇيگە كىرىپ, جابىرلەنۋشىگە اسا قاتىگەزدىكپەن كوپتەگەن دەنە جاراقاتتارىن كەلتىرگەن. كەيىن ۇيدەگى باسقا ادامداردى ۇرىپ-سوعىپ, جابىرلەنۋشى ءومىر بەلگىلەرىن بەرمەگەنىنە كوز جەتكىزگەن سوڭ, وقيعا ورنىنان بوي تاسالاعان. جابىرلەنۋشى اۋىر دەنە جاراقاتى سالدارىنان جەدەل جاردەم كولىگىندە قايتىس بولعان», دەلىنگەن حابارلامادا.
كۇدىكتىلەردىڭ ەكەۋى ءىزىن سۋىتپاي ۇستالىپ, ءارتۇرلى جازالارعا تارتىلعان. ال قالعان ءۇش كۇدىكتى ەلدەن قاشىپ, حالىقارالىق ىزدەۋگە جاريالانعان.
«2024 جىلدىڭ مامىرىندا سىبايلاستارىنىڭ ءبىرى كورشىلەس ەلدەن ەكستراديتسيالانىپ, سوتتالدى. قالعان ەكى ىزدەۋدەگى كۇدىكتى وتكەن جىلدىڭ شىلدەسىندە رەسەي فەدەراتسياسىنىڭ ماسكەۋ وبلىسىندا ۇستالىپ, قازاقستان باس پروكۋراتۋراسىنىڭ سۇراۋى بويىنشا ەلگە ەكستراديتسيالاندى. قازىرگى تاڭدا كۇدىكتىلەر تەرگەۋ يزولياتورىنا قامالدى. ايىپتالىپ وتىرعان قىلمىستاردى جاساعانى ءۇشىن ولارعا 15 جىلدان 20 جىلعا دەيىنگى مەرزىمگە نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان», دەپ حابارلادى باس پروكۋراتۋرانىڭ ءباسپاسوز قىزمەتى.
ايتا كەتەيىك, اتالعان قىلمىستارعا قاتىسى بار بارلىق تۇلعالار اشكەرەلەندى.