تجم ۆيتسە-ءمينيسترى ەرلان نۇرپەيىسوۆ قىزمەتىنەن كەتتى

بۇل تۋرالى ۇكىمەتتىڭ ءباسپاسوز قىزمەتى حابارلادى.

قازاقستان رەسپۋبليكاسى ۇكىمەتىنىڭ قاۋلىسىمەن ەرلان سادكەن ۇلى نۇرپەيىسوۆ توتەنشە جاعدايلار ءمينيسترىنىڭ ورىنباسارى قىزمەتىنەن بوساتىلدى, دەلىنگەن حابارلامادا.

53 جاستاعى نۇرپەيىسوۆ شىعىس قازاقستان وبلىسىنان, قازاقستان رەسپۋبليكاسى ىشكى ىستەر مينيسترلىگىنىڭ الماتى تەحنيكالىق ينستيتۋتىنىڭ تۇلەگى. ەڭبەك جولىن 1992 جىلى ءىىب ءورت ءسوندىرۋ بولىمىندە ورتكە قارسى دايىندىق جانە ءورت ءسوندىرۋ قىزمەتىنىڭ ينجەنەرى بولىپ باستادى.

1993-2005 جىلدار ارالىعىندا شىعىس قازاقستان وبلىسىنىڭ مەملەكەتتىك ورتكە قارسى قىزمەت ورگاندارىندا ءتۇرلى قىزمەتتەر اتقارعان. 2005-2006 جىلدارى ءورت ءسوندىرۋ جانە اۆاريالىق-قۇتقارۋ بولىمشەلەرىنىڭ جۇمىسىن ۇيلەستىرۋ باسقارماسى باستىعىنىڭ ورىنباسارى, 2006-2007 جىلدارى شىعىس قازاقستان وبلىسى تجد ءورت ءسوندىرۋ قىزمەتى باستىعىنىڭ ورىنباسارى بولدى.

2007-2012 جىلدارى شىعىس قازاقستان وبلىسى توتەنشە جاعدايلار دەپارتامەنتىنىڭ ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىن باسقاردى. نۇرپەيىسوۆ 2012-2018 جىلدارى الماتى قالاسى توتەنشە جاعدايلار دەپارتامەنتى باستىعىنىڭ ورىنباسارى قىزمەتىن اتقاردى, ودان كەيىن 2018-2020 جىلدارى الماتى وبلىسىنىڭ توتەنشە جاعدايلار دەپارتامەنتىن باسقاردى.

2020-2023 جىلدارى شىعىس قازاقستان وبلىسى توتەنشە جاعدايلار دەپارتامەنتىنىڭ باسشىسى بولدى.