قوستاناي وبلىستىق تاريحي-ولكەتانۋ مۋزەيى كونە جادىگەرلەرگە باي. اسىرەسە وندا ءوڭىر تاريحىنان سىر شەرتەتىن دۇنيەلەر وتە كوپ. سونداي ەكسپوناتتىڭ ءبىرى – نارقوبىز.
بۇل قاسيەتتى قوبىز اتادان بالاعا مۇرا بولىپ ساقتالعان. ونى مۋزەيگە 2004 جىلى قوستاناي وبلىسى دەنيسوۆ اۋدانىنداعى شوقىباي كەنتىنىڭ تۇرعىنى جاڭىل كوشەروۆا تاپسىرعان. نەگىزى يەسى – نۇرعالي كۇزەمباەۆ ەسىمدى اتامىز. بۇل كىسى, شامامەن 1890-جىلدارى ومىرگە كەلگەن. رۋى نوعايتىلەۋ. ەل ىشىندە نارقوبىزبەن باقسىلىق قۇرعان. ادامداردى ەمدەگەن. اسىرەسە بالا سۇيە الماي جۇرگەن جاندارعا جاردەمى تيگەن.وعان بۇل قوبىز اعاسىنان قالىپتى.
عاسىردان استام تاريحى بار اسپاپ قاراعاشتان ويىپ جاسالعان. ءپىشىنى وجاۋ ءتارىزدى, موينى يىلگەن. شاناعىنىڭ ورتاڭعى بولىگىندە ويىلعان اعاش اقىق جانە مەتالل جاپسىرمالارمەن بەزەندىرىلگەن. سونداي-اق شاناعىنىڭ تومەنگى بولىگىندەگى قۋىس تەرىمەن قاپتالعان.
نارقوبىز – قىل ىشەكتى مۋزىكالىق اسپاپتاردىڭ ىشىندەگى ەڭ كونە ءتۇرى. تاريحي دەرەكتەردە نارقوبىزدى باقسىلار تاڭىرمەن تىلدەسكەندە, جىن-پەرىلەردى قاشىرعاندا جانە وزگە دە ءدىني راسىمدەردە تارتقان ەكەن. سونىمەن بىرگە ونى جاۋگەرشىلىك زاماندا اسكەرگە رۋح بەرۋ ماقساتىندا قولدانعان.