تانىمال ءانشى ديماش قۇدايبەرگەن بۇل بەدەلدى ماراپاتقا ءتورتىنشى رەت يە بولدى, دەپ حابارلايدى Egemen.kz
16 قاڭتاردا استانادا «حالىقتىڭ سۇيىكتىسى-2024» ۇلتتىق سىيلىعىنىڭ ماراپاتتارى سالتاناتتى تۇردە تابىستالدى. ەلدەگى ەڭ تانىمال پرەميا 14-ءشى رەت ءار ءتۇرلى سالاداعى حالىقتىڭ سۇيىكتى قايراتكەرلەرىن تاڭدادى.
قازاقستاننىڭ حالىق ءارتىسى ديماش قۇدايبەرگەن «جىلدىڭ مادەنيەت قايراتكەرى» نوميناتسياسىن جەڭىپ الدى.
ەستەرىڭىزگە سالا كەتەيىك, 2023 جىلى ءانشى «حالىقتىڭ سۇيىكتىسى» سىيلىعىنىڭ ءۇش دۇركىن يەگەرى رەتىندە ارنايى نوميناتسيامەن ماراپاتتالعان بولاتىن.
سالتاناتتى شارادا سىيلىق قازاقستاننىڭ ەڭبەك سىڭىرگەن قايراتكەرى, «DimashAli» شىعارماشىلىق ورتالىعىنىڭ ديرەكتورى قانات ايتباەۆقا تابىستالدى.
«حالقىما, قىمباتتى جەرلەستەرىمە مەنىڭ شىعارماشىلىعىما ەرەكشە دەن قويىپ, قۇرمەتپەن قاراعانى ءۇشىن ۇلكەن ريزاشىلىعىمدى بىلىدىرە وتىرىپ, العىسىمدى ايتامىن. كوپ راقمەت, دوستار! بۇگىن «حالىقتىڭ سۇيىكتىسى» سىيلىعىن العان بارلىق ۇمىتكەرلەردى قۇتتىقتايمىن. بارشاڭىزعا اماندىق پەن بەرەكە تىلەيمىن. ءبىزدىڭ باستامالارىمىزعا قولداۋ تانىتقان اربىرىڭىزگە مول تابىستار تىلەيمىن», دەدى ديماش قۇدايبەرگەن.