ورال قالاسىندا جانتاس ءسافۋلليننىڭ بالالارعا ارنالعان «سىرىم باتىر» كوميكسى جارىق كوردى. جاس ۇرپاققا تۋعان جەردىڭ تاريحىن تانىستىرىپ, ۇلتتىق رۋحىن كوتەرۋدى ماقسات ەتكەن كىتاپ باتىر تۇلعاسىن جان-جاقتى سيپاتتايدى.
جاڭا تۋىندى اتا-انالارعا تاريحىمىز بەن تابيعاتىمىزدى بالاعا قىزىقتى ەتىپ تانىستىرۋعا كومەكشى قۇرال بولا الادى. كوميكس مازمۇنىنا توقتالساق, ساپارعا شىققان اكە مەن بالا «سىرىم شىققان توبە» دەپ اتالاتىن تۇستاعى كەسەنەگە توقتاپ, اكەسى بالاسىنا قاسيەتتى ورىننىڭ تاريحىن اڭگىمەلەپ بەرەدى. ۇلكەندەردىڭ ايتۋى بويىنشا, بۇل تاريحي وقيعا حVIII عاسىردىڭ اياعىندا بولعان. وتارلاۋدى ماقسات تۇتقان سانى مەن كۇشى باسىم جاۋدى سىرىم باتىر اقىلمەن ايلاسىن اسىرىپ بەتىن قايتارعان. مۇزداي قارۋلانعان قالىڭ اسكەردەن حالقىن امان ساقتاپ, جەرىن قورعاپ ەرلىك جاساعان ورىنعا 2007 جىلى ارنايى كەسەنە تۇرعىزىلعان. سىرىم باتىردىڭ ەرلىگى ەستە ساقتاۋعا جەڭىل بولۋ ءۇشىن ولەڭمەن ءورىلىپ, كوركەم سۋرەتتەرمەن ارلەنىپ, كوميكس جانرىنا بەيىمدەلگەن. وقيعا جەلىسىن ولەڭمەن ورگەن – نۇرلان ءسادىر مەن عايساعالي سەيتاق.
«2021 جىلى وسى كوميكستى دايىنداۋعا كىرىسەردىڭ الدىندا سىرىم شىققان توبەگە ارنايى باردىم. اينالا كوك جيەككە دەيىن انىق كورىنەدى, شولىپ قاراۋعا وتە ىڭعايلى جەر ەكەن. توبەنىڭ ۇستىندە, جانىندا قاسقىردىڭ اپاندارى بار», دەيدى اۆتور.
«دانا» ورتالىعىنان 2 000 دانامەن شىققان كوميكس وبلىس كىتاپحانالارىنا تاراتىلادى. QR-كود ارقىلى كوميكس-كىتاپتىڭ بەينەنۇسقاسىن قاراۋعا بولادى. بالانىڭ جادىنا ساقتاۋعا سەپ بولسىن دەپ ارنايى تاپسىرما مەن سوزجۇمباق ۇسىنىلعان.
سونداي-اق بۇل كىتاپ تۇرىك تىلىنە دە اۋدارىلعان. تارجىمالاعان – نۇرساۋلە احاتوۆا. كوميكستىڭ تۇرىكشە نۇسقاسىن باسىپ شىعارۋ دا جوسپاردا بار.
ايتا كەتەيىك, جانتاس ءسافۋلليننىڭ بۇعان دەيىن «جەتپىس بالۋان» كوميكسى جارىق كورگەن ەدى. اۆتوردىڭ ايتۋىنشا, كوميكستەر سەرياسى الداعى ۋاقىتتا دا جالعاسادى.