ونىنشى قاڭتار كۇنى «قىزىلوردا-استانا» باعىتىنداعى ۇشاق بورتىندا دەنساۋلىعى كۇرت ناشارلاعان جولاۋشىعا العاشقى كومەك كورسەتىپ, امان الىپ قالعان استانا مەديتسينا ۋنيۆەرسيتەتىنىڭ 7- كۋرس ستۋدەنتى, قىزىلوردالىق دىنمۇحاممەد بەكتۇرعاندى وسى وقيعادان كەيىن دەنساۋلىق ساقتاۋ ءمينيسترى اقمارال ءالنازاروۆا مينيسترلىكتىڭ «قۇرمەت گراموتاسىمەن» ماراپاتتاعان بولاتىن. بۇگىن وبلىس اكىمى نۇرلىبەك نالىباەۆ ونىڭ اتا-اناسى نۇربولات جانە عاليا نۇرسەيىتوۆتەرمەن كەزدەستى.
وبلىس باسشىسى دىنمۇحاممەدتىڭ جاس بولسا دا, شۇعىل ءارى باتىل ارەكەت جاساعانىنا ريزاشىلىعىن ءبىلدىرىپ, بالاسىنا جاقسى ءتالىم-تاربيە بەرگەن اتا-اناسىنا العىسىن جەتكىزدى. كەزدەسۋدە ءوڭىر باسشىسى وقۋىن ءارى قاراي ءۇش جىلدىق رەزيدەنتۋرادا جالعاستىرۋدى جوسپارلاعان دىنمۇحاممەد بەكتۇرعاننىڭ وقۋ اقىسىن تولەۋگە قولداۋ بىلدىرەتىنىن ايتتى.
«دىنمۇحامەد مەديتسينالىق كومەككە مۇقتاج ازاماتقا دەر كەزىندە العاشقى جاردەم كورسەتىپ, ءومىرىن ساقتاپ قالدى. ونىڭ ۋاقىت وزدىرماي قابىلداعان شەشىمى, ساۋاتتى ءىس-قيمىلى ءوزى سياقتى مەديتسينا ماماندىعىندا ءبىلىم الاتىن جاستارعا ۇلگى-ونەگە بولدى. بۇل ارقىلى دىنمۇحامەد ءوز ماماندىعىن جاقسى مەڭگەرگەنىن عانا ەمەس, اتا-اناسىنان, ۇستازدارىنان, اعا بۋىن ارىپتەستەرىنەن تاعىلىمدى تاربيە العانىن كورسەتتى. ءبىز وسىنداي ازاماتتارعا ءاردايىم قولداۋ كورسەتىپ, ەرلىك ءىسىن وسكەلەڭ ۇرپاققا ۇلگى ەتىپ ناسيحاتتاۋىمىز قاجەت. ءوز ماماندىعىن جەتىك بىلۋگە تالپىنعان, ۇزدىك وقيتىن, پاتريوت ازاماتتى تاربيەلەپ وسىرگەن سىزدەرگە جانە ۇستازدارعا بارشا سىر جۇرتشىلىعىنىڭ, ءوزىمنىڭ اتىمنان زور ريزاشىلىعىمدى بىلدىرەمىن», دەدى ن.نالىباەۆ.