پالاتا دەپۋتاتتارى «زاعيپتاردىڭ جانە كورۋ قابىلەتى بۇزىلعان نەمەسە باسپا اقپاراتىن قابىلداۋ قابىلەتى وزگەدەي شەكتەلگەن ادامداردىڭ جاريا ەتىلگەن تۋىندىلارعا قول جەتكىزۋىن جەڭىلدەتۋ تۋرالى مارراكەش شارتىن راتيفيكاتسيالاۋ تۋرالى» زاڭدى قاراپ, ماقۇلدادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
ايتا كەتەيىك, قازاقستاننىڭ مارراكەش شارتىنا قوسىلۋى كورۋ قابىلەتى ناشار ادامدارعا ارنالعان كىتاپتارعا, جۋرنالدارعا, وقۋ ماتەريالدارىنا قولجەتىمدىلىكتى كەڭەيتۋگە, سونداي-اق, قوعامنىڭ مادەني جانە الەۋمەتتىك ومىرىنە قولجەتىمدىلىكتى قامتاماسىز ەتۋگە مۇمكىندىك بەرەدى. ودان بولەك, اتالعان ساناتتاعى ادامدار ءۇشىن قولجەتىمدى فورماتتاردا جاسالعان تۋىندىلاردىڭ دانالارىمەن حالىقارالىق الماسۋدى جۇزەگە اسىرۋعا جول اشادى.
«مۇمكىندىگى شەكتەۋلى ازاماتتاردىڭ كۇقىقتارىن قورعاۋ جانە ولارعا تەڭ مۇمكىندىكتەر قالىپتاستىرۋ – الەۋمەتتىك ساياساتتىڭ نەگىزگى باعىتتارىنىڭ ءبىرى. وسى رەتتە, قارالعان شارتتىڭ ەرەجەلەرى كورۋ قابىلەتى بۇزىلعان ادامداردىڭ ادەبي جانە كوركەم تۋىندىلارعا قولجەتىمدىلىگىن ارتتىرۋدى كوزدەيدى. اتاپ ايتقاندا, كەلىسىم اياسىندا تاراپتار اراسىندا قولجەتىمدى فورماتتاعى دانالارمەن الماسۋ جانە ولاردى يمپورتتاۋ تەتىكتەرى قاراستىرىلدى. ماقۇلدانعان زاڭ ەلىمىزدە ينكليۋزيۆتى ورتا قالىپتاستىرۋعا وڭ ۇلەسىن قوسادى دەپ سەنەمىز», دەدى ماۋلەن اشىمباەۆ.
سونىمەن قاتار پالاتا وتىرىسىندا سەناتور سۇلتان دۇيسەمبينوۆ ۇكىمەتكە دەپۋتاتتىق ساۋال جولدادى. ول قوناەۆ قالاسىنىڭ ينفراقۇرىلىمدىق دامۋىن قامتاماسىز ەتۋگە قاجەتتى ماقساتتى قارجىلاندىرۋدىڭ جوقتىعىنا نازار اۋداردى. وسىعان بايلانىستى دەپۋتات 2023-2025 جىلدارعا ارنالعان بيۋدجەتتى ناقتىلاۋ كەزىندە رەسپۋبليكالىق بيۋدجەتتەن نىسانالى ترانسفەرتتەر قاراستىرۋدى ۇسىندى.