الماتى وبلىسىندا اسا ءىرى مولشەردە ەسىرتكى كونترابانداسى فاكتىسى بويىنشا سوتقا دەيىنگى تەرگەپ-تەكسەرۋ اياقتالدى. سوت ۇكىمىمەن ايىپتالۋشى 16 جىلعا باس بوستاندىعىنان ايىرىلدى, دەپ حابارلايدى Egemen.kz.
ايتا كەتەيىك, الماتى وبلىسى ىلە اۋدانىنىڭ «قازپوشتا» اق بولىمشەسىنە جالپى سالماعى 800 گراممعا جۋىق كاننابيس سىعىندىسى (گاشيش مايى) ەسىرتكى زاتى بار پوشتا جونەلتىلىمى تۇسكەن.
جەدەل ءىس-شارالار بارىسىندا كۇدىكتى «Telegram» مەسسەندجەرى ارقىلى تايلاندتان ەسىرتكىگە تاپسىرىس بەرگەنى انىقتالدى.
پوشتا جونەلتىلىمىن اشۋ كەزىندە كوسمەتيكالىق زاتتار تۇرىندە جاسىرىلعان 8 ىدىستىڭ ىشىندە ەسىرتكى زاتتارى انىقتالعان.
«سوت ۇكىمىمەن كىنالى تۇلعاعا 16 جىلعا باس بوستاندىعىنان ايىرۋ جازاسى تاعايىندالىپ, تاركىلەنگەن ەسىرتكى جويىلدى. جالپى, بيىلدان باستاپ قما كونتراباندا جانە ەسىرتكى قۇرالدارىنىڭ زاڭسىز اينالىمى فاكتىلەرىنە قاتىستى 135 قىلمىستىق ءىس تىركەدى. سونىمەن قاتار 77,1 كگ ەسىرتكى قۇرالدارى, 3,2 كگ پسيحوتروپتىق زاتتار, 206 مىڭ انابوليكتەر (ۋلى زات) جانە 1 700 «تروپيكاميد» كوز تامشىلارى تاركىلەندى», دەلىنگەن قما حابارلاماسىندا.