سۇراعانىڭدى لەزدە تاۋىپ بەرەتىن, ءماتىن جازۋدىڭ قىر-سىرىن مەيلىنشە مەڭگەرگەن, ءتىپتى جارامسىز دەگەن شىعارمانىڭ ءوزىن بار قاتەسىنەن ارىلتىپ, ءمىنسىز قالىپقا تۇسىرە الاتىن ChatGPT جۇيەسى كۇن ساناپ قارقىندى دامىپ كەلەدى.
ماسەلەن, اتالعان باعدارلاما وسى كۇنگە دەيىن سۇراق قويعان كەزدە عانا جاۋاپ بەرەتىن. ال ەندى بۇدان بىلاي جاساندى زەردە ءوزى ءبىرىنشى بولىپ جازاتىن قابىلەتكە يە. كادىمگى ادام سەكىلدى. ياعني ازاماتتاردىڭ ماڭىزدى جوسپارلارىن ەسكە سالىپ, شىنايى كومەكشى قىزمەتىن اتقارادى. بايقاعاندارىڭىزداي, جاساندى ينتەللەكتىنىڭ قارقىنى قاتتى. قولدانا الساڭ – يگىلىگىڭ, قولدانا الماساڭ – قيعىلىعىڭ.
ءتىرى مۇنارا
كاتالونيا حالقىنىڭ بىرلىگى مەن قايسارلىعىن كورسەتەتىن ەرەكشە ءداستۇرى بار. بۇل – ادامداردان قۇرالعان ءتىرى مۇنارالار قۇرۋ ونەرى «كاستەلس».
مۇنارانىڭ تومەنگى قاباتىن دەنەسى مىعىم مىقتىلار ۇستاپ تۇرسا, جوعارى قاباتتارعا جەڭىل ءارى ەپتى جاستار كوتەرىلەدى. ءار كورەرمەن جانىن شۇبەرەككە ءتۇيىپ, كەرەمەت شوۋعا شومىلادى. اتالعان ءداستۇردىڭ ەكى عاسىردان استام تاريحى بار. 2010 جىلى يۋنەسكو بۇل ونەردى ادامزاتتىڭ ماتەريالدىق ەمەس مادەني مۇراسى دەپ تانىدى.
«قۇپيا ارال»
NASA سپۋتنيكتەرى كاسپي تەڭىزىنەن «چيگيل-دەنيز» اتتى بەلگىسىز ارال تاپتى.
وبسەرۆاتوريا دەرەگىنشە, 2022 جىلدىڭ قاراشاسى مەن 2024 جىلدىڭ جەلتوقسانى ارالىعىندا «Landsat 8, 9» اپپاراتتارى كاسپي تەڭىزىنىڭ جاعالاۋ ايماعىن بىرنەشە رەت سۋرەتكە ءتۇسىرىپ, كەزدەيسوق جاڭا ارالدى انىقتاعان. سپۋتنيكتىك باقىلاۋلار كورسەتكەندەي, ارال كۋماني-بەنك جانارتاۋىنىڭ اتقىلاۋىنان كەيىن پايدا بولعان.