پارالمەنت ءماجىلىسىنىڭ دەپۋتاتى ەرلان سايروۆ پرەمەر-ءمينيستردىڭ ورىنباسارى تامارا دۇيسەنوۆاعا جولداعان دەپۋتاتتىق ساۋالىندا ەلىمىزدەگى ەڭ تومەنگى ەڭبەكاقىنى كوتەرۋدى ۇسىندى, دەپ حابارلايدى Egemen.kz.
«ۇلتتىق ستاتيستيكا بيۋروسىنىڭ مالىمەتتەرىنە سۇيەنسەك, جان باسىنا شاققانداعى كىرىس 112 مىڭ تەڭگەنى قۇرايدى, ونىڭ 98 مىڭ تەڭگەسى تەك قانا ازىق-ت ۇلىك, كيىم-كەشەك, كوممۋنالدىق قىزمەتتى تولەۋگە كەتەدى. مىسالى, ۇلتتىق ستاتيستيكا بيۋروسىنىڭ دەرەكتەرى بويىنشا, كۇرىشتىڭ باعاسى 31,3 پايىزعا, جۇمىرتقا 16,9 پايىزعا, سارى ماي مەن ءسۇت ونىمدەرىنىڭ باعاسى 12 پايىزعا وسكەن», دەپ جازىلعان دەپۋتاتتىڭ ساۋالىندا.
سونداي-اق كوممۋنالدىق قىزمەتتەر ورتاشا العاندا 25 پايىزعا قىمباتتاعان.
«بۇل جاعداي ازاماتتاردىڭ شىعىنىن ارتتىرىپ, كىرىستەرىن تومەندەتىپ جىبەرگەنى انىق. «باعا, قايدا كەتىپ باراسىڭ؟» دەپ جىلامسىرايتىن جاعدايعا دا جەتتىك! ال ەلىمىزدەگى ەڭ تومەنگى تولەم ەكى جىل بولدى 85 مىڭ تەڭگەدەن كوتەرىلمەي تۇر. حالىقارالىق تۋربۋلەنتتىلىككە, ءىرى ەكونوميكالاردىڭ ءوزارا «ساۋدا سوعىستارى» مەن تاريفتىك شيەلەنىستەرىنە بايلانىستى بيىل قازاقستاننىڭ دا ەكونوميكالىق كورسەتكىشتەرى باياۋلاپ, اسىرەسە يمپورتتىق تاۋارلاردىڭ باعاسى ودان ءارى ءوسۋ ىقتيمالدىلىعى زور», دەدى دەپۋتات.
ونىڭ ايتۋىنشا, وسى رەتتە, ۇكىمەت كەلەسى شۇعىل قادامدار جاساۋى قاجەت:
ەڭ تومەنگى تولەمدى يندەكساتسيا جاساۋ; جۇمىسسىزدىقتان ساقتاندىرۋ سوماسىن ارتتىرۋ ارقىلى ەڭ تومەن جالاقى الاتىن ادامداردىڭ ساقتاندىرۋ جۇيەسىن جەتىلدىرۋ; وڭىرلىك اكىمدىكتەر جەرگىلىكتى تۇرعىندارعا ازىق-ت ۇلىك قاۋىپسىزدىگىن قامتاماسىز ەتۋ باعىتىنداعى شارالاردى قولعا الۋى ءتيىس; اكىمدەر وڭىرلىك اۋىل شارۋاشىلىق ونىمدەرىن جەرگىلىكتى نارىققا قاجەتتى مولشەردە جەتكىزىلۋىن قامتاماسىز ەتۋى قاجەت; اۋىل شارۋاشىلىق ونىمدەرىنە بەرىلەتىن مەملەكەتتىك تولەمدەردى ۋاقىتىلى ءارى قاجەتتى سومادا تولىق تولەنۋىن قامتاماسىز ەتۋ قاجەت.