ەستىمەگەن ەلدە كوپ. يتالياداعى بەلكاسترو قالاسىنىڭ مەرى انتونيو تورچيا تۇرعىنداردىڭ اۋرۋىنا زاڭمەن تىيىم سالدى.
وسىلايشا شاھار باسشىسى مەديتسيناداعى ماسەلەلەرگە بيلىك نازارىن اۋدارتپاق بولعان. ويتكەنى بەلكاسترودا وسى كۇنى 1300 ادام ءومىر سۇرەدى. ونىڭ جارتىسىنا جۋىعى ەگدە ادامدار. بىراق مەديتسينالىق ورتالىقتار كوبىنە جابىق تۇرادى. جەدەل جاردەم كورسەتۋ ءبولىمى 45 شاقىرىم جەردە ورنالاسقان. سوندىقتان مەر بۇل بۇيرىقتى مىسقىل ماعىناسىندا تۇسىنگەن دۇرىس دەيدى.
سمارت ساقينا
لاس-ۆەگاستا تانىستىرىلعان جاڭا تەحنولوگيالار جاھان نازارىن اۋداردى.
اسىرەسە «Ultrahuman» كومپانياسىنىڭ «Rare» دەپ اتالاتىن 18 كاراتتىق اشەكەي بۇيىمى ەلدى ەرىكسىز ەلەڭ ەتكىزدى. ويتكەنى بۇل سمارت ساقينا سىمباتىڭىزدى ساقتايدى, ساۋلىعىڭىزدى باقىلايدى. سترەسس دەڭگەيىن, دەنە تەمپەراتۋراسىن قالىپتى ۇستاۋعا كومەكتەسەدى. ال «L’Oréal» كومپانياسىنىڭ «Cell BioPrint» قۇرىلعىسى تەرىگە ءاجىم تۇسپەۋىن اجەپتەۋىر كەشەۋىلدەتەدى. ايتا كەتەيىك, «Rare» جيناعىنىڭ باعاسى شامامەن 2,000 دوللار. جاقىن كۇندەرى پاريج بەن لوندون دۇكەندەرىندە ساتىلىمعا شىعادى.
جىلدام قۋاتتاعىش
ۇيالى تەلەفوندى تىم ۇزاق قۋات-تاۋ سالدارىنان ءورت شىعىپ جاتاتىن جايتتار از ەمەس. ءداستۇرلى «CES 2025» كورمەسىندە وسى ماسەلەنىڭ شەشىمى تابىلدى.
«Swippitt IPS» قۇرىلعىسى – سمارتفونداردى 2 سەكۋندتا-اق تولىق زاريادتايدى. Link باتارەيا كورپۋستارى قازىرشە تەك iPhone 14, 15, 16 ۇلگىلەرىمەن ۇيلەسىمدى. جاڭا تەحنولوگيا وسى جىلى ساتىلىمعا شىعادى.