اقتوبە وبلىسىنا ساپارى بارىسىندا ءماجىلىستىڭ ۆيتسە-سپيكەرى دانيا ەسپاەۆا مەن دەپۋتات جۇلدىز سۇلەيمەنوۆا كوپسالالى وبلىستىق بالالار اۋرۋحاناسى ۇجىمىمەن كەزدەستى. جيىندا مەديتسينا سالاسىنداعى ماسەلەلەر مەن وسى سالادا قابىلدانىپ جاتقان زاڭنامالىق وزگەرىستەر تالقىلاندى, دەپ حابارلايدى Egemen.kz.
دانيا ەسپاەۆا ءماجىلىس قابىرعاسىندا اتقارىلعان جۇمىستارعا, ونىڭ ىشىندە دارىگەرلەردى قورعاۋعا, ولاردىڭ مارتەبەسىن كوتەرۋگە باعىتتالعان جاڭا زاڭنىڭ تيىمدىلىگىنە نازار اۋداردى.
«وتكەن جىلى 106 زاڭ جوباسى ءماجىلىس قاراۋىنا ەنگىزىلىپ, 37-ءسىن قاراستىردىق. ونىڭ 19-نا پرەزيدەنتتىڭ قولى قويىلدى. قازان ايىندا مەديتسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ تۋرالى زاڭدى قارادىق. قازىرگى كەزدە وسى زاڭنىڭ جۇزەگە اسىرىلۋ بارىسىن سىزدەرمەن تالقىلاۋعا دايىنبىز», دەدى دانيا ەسپاەۆا.
جۇلدىز سۇلەيمەنوۆا ءوز سوزىندە ءمامس-كە قاتىستى تۇرعىندار اراسىندا سىن-پىكىرلەر كوبەيگەنىن اتاپ ءوتتى. كەزدەسۋلەردە ازاماتتار ساقتاندىرۋ جۇيەسىنە قوسىلسا دا, مەديتسينالىق قىزمەتتى تولىق كولەمدە الا الماي وتىرعانىن ءجيى ايتىپ ءجۇر. سوندىقتان دا قازىرگى جۇيە دەنساۋلىق ساقتاۋ ءمينيسترىنىڭ قاتىسۋىمەن ءالى دە تالقىلاناتىن بولادى.
«اۋىلدا مەديتسينا ينفراقۇرىلىمىن دامىتۋعا كوپ كۇش سالىپ جاتىرمىز. بىلتىر «AMANAT» پارتياسىنىڭ دەپۋتاتتارى اۋىلدىق جەرلەرگە باراتىن دارىگەرلەر ءۇشىن ءبىر رەتتىك كوتەرمە اقىنى, ياعني ەڭ تومەنگى جالاقىنىڭ 100 ەسەلەنگەن مولشەرىن ەنگىزدىك. بۇل ساپالى مامانداردى اۋىلعا تارتۋعا مۇمكىندىك بەرەدى», دەدى جۇلدىز سۇلەيمەنوۆا.
حيرۋرگ پروفەسسور بولات جاناليەۆ سوڭعى 5 جىلدا بالالار اۋرۋحاناسىنان بىردە-ءبىر دارىگەر مامانداندىرۋ بويىنشا شەتەلدەن ءبىلىمىن جەتىلدىرۋگە شاقىرىلماعانىن اتاپ ءوتتى. سونداي-اق دارىگەرلەر مەديتسينالىق قۇرال-جابدىقتاردىڭ جانە وتا جاساۋعا بولىنەتىن قاراجاتتىڭ جەتكىلىكسىزدىگىن ايتىپ, اۋدانارالىق حيرۋرگيالىق بولىمشەلەر اشۋ تۋرالى ۇسىنىستارىن جەتكىزدى.