7 قاڭتاردىڭ تۇنىندە جالاعاش اۋدانى پوليتسيا بولىمىنە 64 جاستاعى مالشىنىڭ جوعالعاندىعى تۋرالى حابار تۇسەدى. وسى اۋدانداعى جاڭاداريا اۋىلىنىڭ «قۇمجارعان» ۋچاسكەسىندە فازەندادان تاڭەرتەڭ مال ايداپ شىققان ازامات كەشكە ورالماعان. داۋىلدى كۇنى جوعالعان ەر ادامدى اۋەلى شارۋا قوجالىعىنداعى مالشىلار وزدەرى ىزدەپتى. ودان ناتيجە شىقپاعاسىن پوليتسياعا جۇگىنۋگە تۋرا كەلگەن, دەپ حابارلايدى Egemen.kz.
ادام جوعالۋ دەرەگى جالاعاش اۋداندىق پوليتسيا بولىمىنە تىركەلىپ, قاجەتتى شارالار جۇرگىزىلدى. پوليتسەيلەر, توتەنشە جاعداي دەپارتامەنتىنىڭ قىزمەتكەرلەرى, اۋىل تۇرعىندارى مەن ەرىكتىلەردەن ارنايى توپ قۇرىلىپ, بارلىق اۋىلدار, دالالىق جولدار تۇگەل قامتىلدى. وسىنىڭ ناتيجەسىندە جوعالعان مالشى تۇنگى 02:00 شاماسىندا امان-ەسەن تابىلدى. قوجالىق يەسى اۋداندىق پوليتسيا ءبولىمىنىڭ قىزمەتكەرلەرىنە الەۋمەتتىك جەلى ارقىلى العىس ايتتى.
پوليتسيا قىزمەتكەرلەرى داۋىلدى ەسكەرتۋ جاريالانعان ۋاقىتتا الىس ساپارعا شىقپاۋ كەرەكتىگىن ەسكەرتەدى. ال جىلدىڭ قاي مەزگىلىندە دە قاۋىرت جۇمىس جاسايتىن شارۋا قوجالىعىنداعى قىزمەتكەرلەر قىستاۋلار مەن جايىلىمداردان الىس كەتپەۋگە تىرىسقانى ءجون.