ليساكوۆ قالاسىندا كوپبالالى التى وتباسى باسپانالى بولدى. شاعىن قالادا حالىقتىڭ الەۋمەتتىك وسال توبىنا جاتاتىن وتباسىلارعا جەرگىلىكتى بيۋدجەت ەسەبىنەن 19 پاتەر ساتىپ الىندى.
تۇرعىندارعا پاتەر كىلتتەرىن قالا اكىمى اباي ىبىراەۆ تابىس ەتتى. «بۇل جولى التى كوپبالالى وتباسىعا ءۇش بولمەلى پاتەردىڭ كىلتىن تابىستاعالى تۇرمىز. ءبىز ءبىرىنشى شاعىن اۋدانداعى اكىمشىلىك عيماراتتى 21 پاتەرلى ۇيگە اينالدىردىق. وعان تۇرعىن ءۇي كەزەگىندە تۇرعان بيۋدجەت قىزمەتكەرلەرى قونىستاندى. سونداي-اق مەديتسينا, سپورت قىزمەتكەرلەرى مەن پەداگوگتەرگە بەرىلدى. ەندىگى ەكى بولمەلى ءۇش پاتەر تۇرعىن ءۇي كەزەگىنە قاراي, اتا-اناسىز بالالارعا بەرىلەتىن بولادى. قازىر «قازاقستان» تۇرعىن ءۇي كومپانياسىمەن بىرگە بەس قاباتتى الپىس پاتەردىڭ سمەتالىق قۇجاتىن ازىرلەپ جاتىرمىز», دەدى اكىم.
باسپانا قۋانىشىنا يە بولعانداردىڭ ىشىندە بەس بالانىڭ اناسى ۆالەريا فريزەن دە بار. ءبىر جارىم جىل ءۇي كەزەگىندە تۇرعان كوپبالالى انا قالا باسشىلىعىنا, قۇرىلىسشىلارعا جۇرەكجاردى العىسىن ءبىلدىردى. «جولداسىم جۇمىس ىستەيدى. ءوزىم بالا تاربيەسىمەن اينالىسامىن. التىنشى ءسابيىمىزدى كۇتىپ وتىرمىز. بۇعان دەيىن پاتەردەن پاتەرگە كوشىپ, جالداپ جۇرگەن ەدىك. قۋانىشىمىزدا شەك جوق. تۇڭعىشىمىز – توعىز جاستا, كەنجە بالامىز ءبىر جارىم جاستا», دەيدى ۆالەريا فريزەن.
ليساكوۆ تۇرعىنى اقتوتى ماعزۇموۆا دا 85 شارشى مەترلىك ءۇش بولمەلى پاتەردىڭ كىلتىن الدى. «جولداسىم ەكەۋىمىز ءتورت بالا ءسۇيىپ وتىرمىز. كەزەككە تۇرعانىمىزعا ءبىر جىلعا جەتكەن جوق. وتە قۋانىشتىمىز. بۇعان دەيىن ەنەمنىڭ قولىندا تۇرىپ كەلدىك», دەيدى كوپبالالى انا.
بۇگىندە ليساكوۆ قالاسىندا 570 تۇرعىن پاتەر كەزەگىندە تۇر.
قوستاناي وبلىسى