2025 جىلعى 1 قاڭتاردان باستاپ مەملەكەتتىك بازالىق زەينەتاقى مولشەرى ءوستى. ۇلتتىق بانك ايقىندايتىن ينفلياتسيانىڭ بولجامدى دەڭگەيىنە سايكەس 6,5%-عا, ىنتىماقتى زەينەتاقى 8,5%-عا, ياعني ينفلياتسيا دەڭگەيىنەن 2% - عا وزا ۇلعايتىلعان, دەپ جازادى Egemen.kz.
بۇدان بولەك مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەنگى بازالىق زەينەتاقىنى ەڭ تومەن كۇنكورىس دەڭگەيىنىڭ 70 %-نا دەيىن, ەڭ جوعارى – 120 %-عا دەيىن جىل سايىن كەزەڭ-كەزەڭىمەن ارتتىرۋ جالعاسادى.
ماسەلەن, 2025 جىلعى 1 قاڭتاردان باستاپ بازالىق زەينەتاقىنىڭ ەڭ تومەن مولشەرى ەڭ تومەن كۇنكورىس دەڭگەيىنىڭ 65%-نان 70%-عا دەيىن ۇلعايتىلدى. بۇل مولشەر 32 360 تەڭگەنى قۇراپ, ونىڭ ەڭ جوعارى مولشەرى ەڭ تومەن كۇنكورىس دەڭگەيىنەن 105-تەن 110%-عا دەيىن ارتتىرىلىپ, 50 851 تەڭگەنى قۇرايدى.
«مىسالى, 2019 جىلى زەينەتكە شىققان 69 جاستاعى زەينەتكەردىڭ 2024 جىلى بيۋدجەتتەن تولەنەتىن زەينەتاقى مولشەرى 156 856 تەڭگەنى قۇرادى, ونىڭ ىشىندە بازالىق زەينەتاقى تولەمى – 45 578 تەڭگە, ىنتىماقتى زەينەتاقى – 111 278 تەڭگە. 2025 جىلعى 1 قاڭتاردان باستاپ ءوسىمدى ەسكەرە وتىرىپ, وسى زەينەتكەر ءۇشىن زەينەتاقىنىڭ جالپى سوماسى 171 588 تەڭگەگە دەيىن ۇلعايدى, ونىڭ ىشىندە بازالىق زەينەتاقى – 50 851 تەڭگەنى, ىنتىماقتى زەينەتاقى – 120 737 تەڭگەنى قۇرادى. اتالعان سومالارعا بجزق-داعى تولەمدەر كىرمەيتىنىن اتاپ ءوتۋ ماڭىزدى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارالاماسىندا.
انىقتاما ءۇشىن: ىنتىماقتى زەينەتاقى دەگەنىمىز - رەسپۋبليكالىق بيۋدجەتتەن بەرىلىپ, ازاماتتىڭ ءومىرىنىڭ سوڭىنا دەيىن تولەنەدى.