سەنات دەپۋتاتى ماۋلەن اشىمباەۆ مەملەكەت باسشىسىنىڭ «Ana tili» گازەتىنە بەرگەن سۇحباتىنا وراي Facebook جانە Instagram الەۋمەتتىك جەلىلەرىندە ءوز ويىن ورتاعا سالدى, دەپ حابارلايدى Egemen.kz.
كەشە «Ana tili» گازەتىنە پرەزيدەنت قاسىم-جومارت توقاەۆتىڭ كولەمدى سۇحباتى جاريالاندى. وندا مەملەكەت باسشىسى وتكەن جىلى اتقارىلعان جۇمىستاردى وي ەلەگىنەن وتكىزىپ, الداعى مىندەتتەردىڭ ماڭىزىنا توقتالعان.
- وسى ورايدا پرەزيدەنتىمىزدىڭ جىل باسىندا باسپاسوزگە سۇحبات بەرىپ, ەل دامۋىنىڭ باسىم باعىتتارىن ايقىنداپ الۋ يگى داستۇرگە اينالىپ كەلە جاتقانىن اتاپ وتكەن ءجون.
بيىل دا مەملەكەت باسشىسى تەڭگە باعامىنان باستاپ قاڭتار وقيعاسىنا دەيىنگى قوعامدا قىزۋ تالقىلانعان وزەكتى ماسەلەلەرگە قاتىستى كوپتىڭ كوكەيىندە جۇرگەن ساۋالدارعا جاۋاپ بەردى. بۇل پرەزيدەنتىمىزدىڭ اشىقتىق, ديالوگ, ادىلەتتىلىك قاعيداتىنا تابان تىرەگەن ساياساتىنىڭ جارقىن كورىنىسى ەكەنى انىق, - دەلىنگەن سەنات توراعاسىنىڭ جازباسىندا.
جالپى پرەزيدەنتىمىز قاسىم-جومارت توقاەۆ ايتقانداي, بىلتىر كەشەندى باستامالار جالعاسىن تاۋىپ, ەلىمىز ەلەۋلى ناتيجەلەرگە قول جەتكىزدى. ينفراقۇرىلىمدى جاڭعىرتۋ باعىتىندا ايتارلىقتاي جۇمىس قولعا الىندى.
سونداي-اق 18 ملن شارشى مەتر تۇرعىن ءۇي پايدالانۋعا بەرىلدى جانە 7 مىڭ شاقىرىم جول سالىنىپ, جوندەلدى. الماتى, قىزىلوردا جانە شىمكەنت اۋەجايلارىندا جاڭا تەرمينال ىسكە قوسىلدى.
- وڭدەۋ سەكتورىنىڭ ونەركاسىپتەگى ۇلەسى ءوندىرۋ سالاسىنىڭ دەڭگەيىنە جۋىقتادى. ديقاندار 27 ميلليون تونناعا جۋىق استىق جيناپ, سوڭعى جىلدارداعى رەكوردتىق كورسەتكىش تىركەلدى. بۇل قازاقستاننىڭ اۋىل شارۋاشىلىعى سالاسىنداعى الەۋەتىن ارتتىرا تۇسكەنى ءسوزسىز.
الەۋمەتتىك مەملەكەت رەتىندە ەلىمىزدە بۇل باعىتقا باسا ءمان بەرىلدى. وسىعان بايلانىستى بىلتىردان باستاپ «ۇلتتىق قور – بالالارعا» باعدارلاماسى اياسىندا تولەم بەرىلىپ كەلەدى. زەينەتاقى, جاردەماقى, شاكىرتاقى جانە ازاماتتىق سالا قىزمەتكەرلەرىنىڭ جالاقىسى كوبەيدى. ەلىمىزدىڭ تۇكپىر-تۇكپىرىندە جۇزدەگەن جاڭا مەكتەپ, بالاباقشا جانە شەتەلدىڭ جەتەكشى جوعارى وقۋ ورىندارىنىڭ بولىمشەلەرى اشىلدى, - دەيدى م.اشىمباەۆ.
ونىڭ پايىمىنشا, سوڭعى جىلداردا مەملەكەتىمىزدىڭ ەكونوميكالىق الەۋەتىن, ەگەمەندىگىن جانە حالىقارالىق ارەناداعى ورنىن نىعايتۋ باعىتتارى بويىنشا اۋقىمدى جۇمىس اتقارىلعانى بەلگىلى. وسى رەتتە بارلىق ەكونوميكالىق رەفورما, ەڭ الدىمەن, ازاماتتاردىڭ ءومىر ءسۇرۋ ساپاسىن ارتتىرۋدى كوزدەيتىنىن ايتا كەتكەن ابزال.
سۇحباتتا كەشەندى رەفورمالاردى زاڭنامالىق تۇرعىدان قامتاماسىز ەتۋ ماسەلەسى دە ءسوز بولعان. وسىعان بايلانىستى بىلتىر ايەلدەردىڭ قۇقىعىن قورعاۋ, بالالاردىڭ قاۋىپسىزدىگىن قامتاماسىز ەتۋ, «كەلەشەك» اتتى بىرىڭعاي ەرىكتى جيناقتاۋشى جۇيەنىڭ قىزمەتىن جۇرگىزۋ, نەسيە الىپ, قارىزعا باتۋعا جول بەرمەۋ, ەسىرتكىمەن, لۋدومانيامەن كۇرەس جانە تاعى باسقا سالالارعا قاتىستى زاڭدار قابىلداندى.
- پرەزيدەنتىمىز وسى جۇمىستى ىسكە اسىرۋ جولىندا پارلامەنت ماڭىزدى ءرول اتقارىپ كەلە جاتقانىن ايتتى. بۇل – ءبىز ءۇشىن جوعارى باعا جانە زور جاۋاپكەرشىلىك.
مەملەكەت باسشىسى كوكتەمگى سۋ تاسقىنى مەن ماڭعىستاۋ وبلىسىندا بولعان ۇشاق اپاتىنا دا توقتالىپ, اتالعان سىن-ساعاتتاردا حالقىمىز ىنتىماقتىڭ وزىق ۇلگىسىن كورسەتكەنىن تىلگە تيەك ەتتى. ازاماتتاردىڭ قورشاعان ورتانى قورعاۋعا قاتىستى جاۋاپكەرشىلىگىن ارتتىرا تۇسكەن جاسامپاز جوبا «تازا قازاقستان» ەكولوگيالىق اكتسياسىنىڭ ماڭىزى دا اتاپ ءوتىلدى.
پرەزيدەنتىمىز الداعى ەكونوميكالىق جاڭا رەفورمالاردىڭ ستراتەگيالىق باعدارىن دا بەلگىلەپ بەردى. سوعان سايكەس شيكىزاتتىق ەمەس سەكتورلاردى دامىتۋ ارقىلى ەكونوميكانىڭ ءوسىمىن قامتاماسىز ەتۋ مەملەكەتتىك ساياساتتىڭ نەگىزگى باعىتى بولماق. سول ءۇشىن وڭدەۋ ونەركاسىبىن دامىتۋعا, زاماناۋي تەحنولوگيالاردى ەنگىزۋگە جانە ەكونوميكانى ارتاراپتاندىرۋعا باسا ءمان بەرىلەدى, - دەپ جازادى سەنات توراعاسى.
تۇرعىن ءۇي, جاڭا جايلى مەكتەپتەر مەن مەديتسينالىق نىساندار سالۋ ارقىلى الەۋمەتتىك ينفراقۇرىلىمدى دامىتۋ جۇمىسى جالعاسا بەرەدى.
سونداي-اق بيىل «جۇمىسشى ماماندىقتار جىلى» اياسىندا ەڭبەك ادامىنىڭ بەدەلىن كوتەرۋگە جانە ەڭبەكقورلىق, كاسىبيلىك سياقتى قۇندىلىقتاردى دارىپتەۋگە ەرەكشە كوڭىل بولىنەدى.
سۇحباتتا حالىقارالىق ىنتىماقتاستىقتى ودان ءارى نىعايتىپ قازاقستاننىڭ الەمدىك ارەناداعى ورتا دەرجاۆا رەتىندەگى ءرولىن كۇشەيتۋ ماسەلەلەرى دە ايتىلدى. تالعارداعى قىلمىستى وقيعا, بىرىڭعاي ساعاتتىق بەلدەۋ, مەرزىمىنەن بۇرىن سايلاۋ ماسەلەلەرى دە نازاردان تىس قالعان جوق.
- پرەزيدەنتىمىز جاس بۋىننىڭ بەلسەندىلىگىنە, ولاردىڭ ەل ەرتەڭىنە بەيجاي قاراماي, بارلىق باستاماعا ءۇن قوسىپ كەلە جاتقانىنا نازار اۋدارىپ, وسكەلەڭ ۇرپاقتىڭ بويىنا دۇرىس قۇندىلىقتاردى ءسىڭىرۋدىڭ ماڭىزىنا دا توقتالىپ ءوتتى.
جالپى, سۇحباتتا ەگەمەندىگىمىزدى نىعايتۋدى جانە ەلىمىزدى وركەندەتۋدى كوزدەيتىن باسىم باعىتتار ناقتى بەلگىلەندى. ولاردى ىسكە اسىرۋعا ءار قازاقستاندىق اتسالىسىپ, ەلدىك مۇددە جولىندا ءبارىمىز جۇدىرىقتاي جۇمىلۋىمىز كەرەك. سول كەزدە عانا زاڭ مەن ءتارتىپ سالتانات قۇرعان, دامىعان ادىلەتتى قازاقستان قالىپتاستىرامىز, - دەيدى ماۋلەن اشىمباەۆ.