قازاقستاندا ۇكىمەتتىڭ جاڭا قۇرامى جاساقتالعانىنا 11 اي ءوتتى. وسى ورايدا پرەزيدەنت قاسىم-جومارت توقاەۆ مينيسترلەر كابينەتىنىڭ جۇمىسىنا قاتىستى پىكىر ءبىلدىردى, دەپ حابارلايدى Egemen.kz.
«ۇكىمەتتىڭ مىندەتى – ەكونوميكانىڭ ءوسىمىن قامتاماسىز ەتۋ جانە ازاماتتاردىڭ ءال-اۋقاتىن جاقسارتۋ. جالپى العاندا, مينيسترلەر كابينەتى بۇل مىندەتىن ورىنداپ وتىر. ەكونوميكانى ءارتاراپتاندىرۋ, وڭدەۋ ونەركاسىبىن دامىتۋ, ينفراقۇرىلىمدى جاڭعىرتۋ سياقتى باعىتتار بويىنشا بىلتىر اتقارىلعان جۇمىستىڭ ناتيجەلەرى جامان ەمەس. الايدا ءبارى ءمىنسىز دەۋگە كەلمەيدى, پروبلەمالار دا بار», دەدى پرەزيدەنت سۇحبات بارىسىندا.
مەملەكەت باسشىسى مينيسترلەردەن نەعۇرلىم ءتيىمدى جۇمىس ىستەۋدى جانە شەشىم قابىلداعاندا باتىل بولۋدى ۇنەمى تالاپ ەتەتىنىن تىلگە تيەك ەتتى. سەبەبى قوعام دا ۇكىمەتتىڭ جۇمىسىنا جوعارى تالاپ قويادى.
«بۇل – وتە ورىندى ءارى قالىپتى جاعداي. سوندىقتان ۇكىمەتتىڭ جۇمىسى ناقتى ناتيجەگە وراي, ءادىل باعالانادى. باستى كورسەتكىش – ازاماتتاردىڭ تۇرمىس ساپاسى. ەكونوميكاداعى جەتىستىكتەر ادامداردىڭ كۇندەلىكتى ومىرىنە وڭ اسەرىن تيگىزبەسە, ونى انشەيىن ءسوز جۇزىندەگى جەتىستىك دەۋگە بولادى.
جۋىق ارادا ۇكىمەتتىڭ كەڭەيتىلگەن وتىرىسى وتەدى. سول كەزدە جىلدى قورىتىندىلاپ, قازىرگى ماسەلەلەردى تالقىلاپ, جاڭا جوسپارلار جاسايمىز. قازاقستانعا ەكونوميكانىڭ 4 پايىزدىق ءوسىمى ازدىق ەتەتىنى انىق. بۇل تۋرالى شەتەل وكىلدەرىنە دە ايتىپ ءجۇرمىن. ۇكىمەت ەكونوميكانى بارىنشا دامىتۋ ءۇشىن تىڭ تاسىلدەر تابۋعا ءتيىس», دەدى قاسىم-جومارت توقاەۆ.