عالام عاجاپتارى: اقىلدى روبوت

قازىردىڭ وزىندە شانحايداعى ءوندىرىس ورتالىعى 1000 دانا روبوت قۇراستىرىپ, جىل سوڭىنا دەيىن تاپسىرۋعا دايىندالىپ جاتىر. «بۇعان دەيىن روبوتتار جاپپاي وندىرىلگەن ەمەس. جاڭا قۇلتەمىرلەردىڭ بويى 1,7 مەتر بولادى. ولار ءۇي شارۋاسىنا, قوعامدىق جۇمىسقا, كوڭىل كوتەرۋگە, ءبىلىم سالاسى مەن قىزمەت كورسەتۋگە, جالپى كوممەرتسيالىق ماقساتتا پايدالانىلادى. مۇنىڭ ءبارى جاساندى ينتەللەكت ارقىلى باسقارىلادى. سۇرانىس بار. ەندى ءوندىرىس تىزبەگىن جۇيەلەپ, قولدانۋ اياسىن كەڭەيتۋگە كۇش سالامىز», دەيدى تسزياوتۋن ۋنيۆەرسيتەتى روبوتتەحنيكا ينستيتۋتىنىڭ عىلىمي جەتەكشىسى يان ۆەيسين.

جاڭا رەكورد

گەرمانيادا تۇراتىن توماس پەن سيۋزان جاڭا جىلدى اسىعا كۇتەدى. ولار ءۇيىن ءبىر اي بۇرىن بەزەندىرە باستايدى. قىزىق بولعاندا, بيىل قىزدى-قىزدىمەن 605 شىرشا ورناتىپ تاستاپتى. بۇل ءتىپتى الەمدىك رەكورد رەتىندە رەسمي تىركەلدى.

يەروميندەردىڭ ءۇيى گەرمانيانىڭ سول­تۇستىگىندەگى رينتەلن قالاسىندا ور­نالاسقان. اۋماعى – 180 شارشى مەتر. ولار ءتىپتى جۋىناتىن بولمە مەن دارەت­حاناعا دەيىن شىرشا قويعان. ەرلى-زايىپتى بۇل ىسپەن 8 جىلدان بەرى تۇراقتى اينالىسىپ كەلەدى. بىلتىر 555 شىرشا ورناتقان.

ەشتەن كەش جاقسى

ۆەتنامدا 12 جىل دەگەندە ەڭ ال­عاشقى مەترو ىسكە قوسىلدى. ول ەلدىڭ وڭتۇستىگىندەگى حوشيمين قالاسىنىڭ ورتالىعى مەن شەتىندەگى اۋداندار اراسىندا قاتىنايدى.

جوبا جاپونيا ۇكىمەتىنىڭ قار­جىلاي قولداۋىمەن سوناۋ 2007 جىلى ماقۇلدانعان. قۇرىلىس جۇمىسى 2012 جىلى باستالىپ, جوسپاردان تالاي رەت كەشىككەن. بيلىك ەندى كولىك كەپتەلىسى مەن اۋانىڭ لاستانۋ ماسەلەسى ءبىراز جەڭىلدەيدى دەپ ۇمىتتەنىپ وتىر. العاشقى ءبىر اي بويى مەترومەن قاتىناۋ تەگىن بولادى. «مەنىڭ تاعى ءبىر نەمەرەم بار. كىشكەنتاي كەزىندە وعان «قۇرىلىسى ءبىتسىن, سوسىن ەكەۋىمىز مەترومەن جۇرەمىز» دەپ ەدىم. ونىڭ ۇزاققا سوزىلاتىنىن كىم بىلگەن؟ سول نەمەرەم قازىر ۋنيۆەرسيتەتتە وقيدى. بىراق ەشتەن كەش جاقسى», دەيدى قالا تۇرعىنى حيۋين بحيبە.