2024 جىل ەلىمىز ءۇشىن ەرەكشە وقيعالارمەن ەستە قالدى. ەكولوگيالىق مادەنيەتتى دامىتۋ, تەحنولوگيالىق سەرپىلىستەر, ەكونوميكالىق تابىستار جانە قۇقىقتىق جۇيەدەگى ماڭىزدى وزگەرىستەر — وسىنىڭ ءبارى قازاقستاننىڭ تۇراقتى دامۋى مەن بولاشاعىنىڭ جارقىن بەينەسىن كورسەتەدى, دەپ جازادى Egemen.kz.
«تازا قازاقستان» اكتسياسى تۇراقتى جوباعا اينالدى
2024 جىلدىڭ ساۋىرىندە مەملەكەت باسشىسىنىڭ باستاماسىمەن «تازا قازاقستان» ەكولوگيالىق اكتسياسى باستالدى. باستاپقىدا بۇل شارا 8 ءساۋىر مەن 13 مامىر ارالىعىندا وتەدى دەپ جوسپارلانعان بولاتىن. ءار اپتا ناقتى تاقىرىپتارعا ارنالدى: «تازا ولكە», «كيەلى مەكەن», «جاسىل ايماق», «ونەگەلى ۇرپاق», ء«مولدىر بۇلاق». الايدا حالىقتىڭ كەڭ قولداۋىنىڭ ارقاسىندا اكتسيا ۇزارتىلىپ, جىل بويى جالعاساتىن تۇراقتى جوباعا اينالدى.
اكتسياعا 5,83 ميلليوننان استام ازامات قاتىسىپ, 1,1 ميلليون توننادان اسا قوقىس جينالىپ, 1,6 ميلليون اعاش وتىرعىزىلدى. ۇزاق مەرزىمدى ناتيجەلەردى قامتاماسىز ەتۋ ءۇشىن 2024-2029 جىلدارعا ارنالعان ەكولوگيالىق مادەنيەتتى دامىتۋ تۇجىرىمداماسى بەكىتىلدى.
«تازا قازاقستان» — بۇل ءبىر رەتتىك شارا ەمەس, ەكولوگيالىق جاعدايدى جاقسارتىپ, حالىقتىڭ ەكولوگيالىق ساناسىن ارتتىرۋعا ارنالعان جۇيەلى جوبا.
اەس قۇرىلىسىن جۇرگىزۋدى حالىق قالادى
6 قازاندا قازاقستاندا اەس قۇرىلىسى تۋرالى رەفەرەندۋم ءوتتى. ناتيجەسىندە 71,12% ازامات اتوم ەلەكتر ستانتسياسىن سالۋ يدەياسىن قولدادى. رەفەرەندۋمعا 7,82 ميلليون ادام (63,66%) قاتىستى. بۇل شەشىم تەك تەحنولوگيالىق پروگرەسس پەن ەنەرگەتيكالىق قاۋىپسىزدىككە باعىتتالعان قادام ەمەس, سونىمەن قاتار ەل ازاماتتارىنىڭ ساياسي ومىرگە بەلسەندى قاتىساتىنىن كورسەتەتىن ماڭىزدى بەلگى.
مەملەكەت باسشىسى اەس قۇرىلىسىن حالىقارالىق كونسورتسيۋم ارقىلى جۇزەگە اسىرۋ يدەياسىن قولدايتىنىن ايتتى. بۇل قازاقستان ءۇشىن قاۋىپسىز ءارى زاماناۋي شەشىمدەردى قامتاماسىز ەتەدى.
رەكوردتىق دەڭگەيدە استىق جينالدى
ەلىمىزدە اۋىل شارۋاشىلىعى سالاسىندا ايتارلىقتاي جەتىستىككە قول جەتكىزىلدى. اگرارلىق سەكتور جۇمىستارىنىڭ ناتيجەسىندە 2024 جىلى ورتاشا ونىمدىلىك 16,1 تس/گا بولىپ, جالپى 26,7 ميلليون توننا استىق جينالدى. سالىستىرمالى تۇردە, 2023 جىلى ورتاشا ونىمدىلىك 10 تس/گا بولعان ەدى. بۇل رەكورد اگرارلىق سەكتوردىڭ دامۋىنداعى ماڭىزدى قادام ەكەنىن كورسەتەدى.
ۋاقىت بەلدەۋى اۋىستى
قازاقستان رەسپۋبليكاسى ۇكىمەتىنىڭ 2024 جىلعى 19 قاڭتارداعى №20 قاۋلىسىنا سايكەس «قازاقستان رەسپۋبليكاسىنىڭ اۋماعىندا ۋاقىتتى ەسەپتەۋ ءتارتىبى تۋرالى» 2024 جىلعى 29 اقپاننان باستاپ 2024 جىلعى 1 ناۋرىزعا قاراعان ءتۇنى (ساعات 00:00-دە) ۋاقىتتى 1 ساعاتقا ارتقا اۋىستىرۋدى كوزدەيتىن وزگەرىستەر ەنگىزىلدى.
وسىلايشا, 29 اقپاننان 1 ناۋرىزعا قاراعان ءتۇنى ەلىمىز بىرىڭعاي ۋاقىت بەلدەۋىنە اۋىسىپ, ساعات ءتىلى ءبىر ساعاتقا ارتقا جىلجىدى.
جىلدىڭ رەزونانس تۋدىرعان سوت پروتسەسى
جۇرت اراسىندا دۇربەلەڭ تۋدىرىپ, الەم نازارىن وزىنە قاراتقان سوت پروتسەستەرىنىڭ ءبىرى - قۋاندىق بيشىمباەۆ ءىسى. ونىڭ اشىق ونلاين فورماتتا ۇيىمداستىرىلۋى قوعام نازارىن اۋدارىپ, تۇرمىستىق زورلىق-زومبىلىققا قارسى زاڭداردىڭ قابىلدانۋىنا ىقپال ەتتى.
2024 جىل وسىلايشا قازاقستاننىڭ الەۋمەتتىك, ەكونوميكالىق جانە ساياسي دامۋىنداعى جاڭا بەلەستەردى كورسەتىپ, ەل تاريحىندا ماڭىزدى جىلداردىڭ ءبىرى رەتىندە ەستە قالدى.
2024 جىل قازاقستان ءۇشىن ەكونوميكالىق ءوسىمنىڭ, ساياسي تۇراقتىلىقتىڭ جانە مادەني جاڭعىرۋدىڭ جىلى بولدى. ەلدە جۇزەگە اسىرىلعان رەفورمالار مەن شارالار مەملەكەتتىڭ دامۋىنداعى جاڭا كەزەڭنىڭ باستاماسى رەتىندە تاريحتا قالادى. قازاقستان حالقىنىڭ بىرلىگى مەن ىنتىماعى ەلدىڭ بولاشاعىن جارقىن ەتۋگە سەپتىگىن تيگىزىپ وتىر.