اباي وبلىسىندا ەلىمىزدى قىتايمەن بايلانىستىراتىن جولاۋشىلار تەرمينالى اشىلدى. مەملەكەتتىك شەكارانىڭ قازاقستان-قىتاي ۋچاسكەسىندە ىسكە قوسىلعان تەرمينال حالىقارالىق بايلانىستاردى نىعايتۋعا جول اشادى. تەرمينال «باقتى» كەدەن بەكەتىن جاڭعىرتۋ, تەحنيكالىق جاراقتاندىرۋ اياقتالعانعا دەيىن جۇمىس ىستەيدى.
بۇل بەكەت تۋريستەرگە قولدانىستاعى زاڭناماعا سايكەس بەلگىلەنگەن تارتىپپەن ەكى ەل اراسىنداعى شەكارادان ەركىن وتۋگە مۇمكىندىك بەرەدى. بۇعان دەيىن تەرمينالدار تەك جۇك كولىگىن وتكىزۋ ماقساتىندا جۇمىس ىستەدى. جاڭا تەرمينالدى ىسكە قوسۋدىڭ ارتىقشىلىعى – ەل ازاماتتارى كورشىلەس مەملەكەتكە ءوتىپ, بەلگىلەنگەن ۋاقىت ىشىندە بارعان-كەلگەن شارۋاسىن تىندىرىپ شىعا الادى. بۇعان قوسا ارنايى رۇقساتى بار اۆتوكولىكپەن كىرۋ ماسەلەسى دە قاراستىرىلعان.
تەرمينال بارلىق جولاۋشىلارعا مەملەكەتتىك شەكارادان ىڭعايلى, قاۋىپسىز ءوتۋدى قامتاماسىز ەتەدى. بۇل شارا كەدەندىك باقىلاۋ ۇدەرىسىن جەدەلدەتىپ, كۇتۋ ۋاقىتىن قىسقارتۋعا مۇمكىندىك بەرەدى دەيدى ارنايى سالا ماماندارى.
«تەرمينالدى ىسكە قوسۋ مەملەكەتتىك كىرىستەر كوميتەتىنىڭ قحر وكىلدەرىمەن ۇيلەسىمدى جۇمىسىنىڭ, ىنتىماقتاستىعىنىڭ ارقاسىندا جۇزەگە اسىپ وتىر. بۇل رەتتە قحر-دان جەكە پايدالانۋ ءۇشىن اكەلىنەتىن جۇكتىڭ سالماعى «جەكە پايدالانۋعا ارنالعان تاۋارلار مەن جەكەلەگەن ماسەلەلەر تۋرالى» ەۋرازيالىق ەكونوميكالىق كوميسسيا كەڭەسىنىڭ 2017 جىلعى 20 جەلتوقسانداعى №107 شەشىمىنە سايكەس ايىنا 25 كيلوگرامنان اسپاۋى ءتيىس. تەرمينالدى ىسكە قوسقاننان بەرى ەلىمىزگە 180 ادام كەلسە, قىتايعا 214 تۇلعا ءوتتى», دەيدى اباي وبلىسى بويىنشا مەملەكەتتىك كىرىستەر دەپارتامەنتىنىڭ ءتۇسىندىرۋ جۇمىسى جانە بايلانىس ورتالىعى باسقارماسىنىڭ باسشىسى اسەم تۇرلىبەكوۆا.
كەلەر جىلدىڭ قازاقستانداعى قىتاي ءتۋريزمى جىلى بولىپ جاريالانعانىن ەسكەرسەك, تەرمينال ءتۋريزمدى دامىتۋعا, قازاقستان-قىتاي اراسىنداعى دوستىق قارىم-قاتىناستى نىعايتۋعا دا مول مۇمكىندىك بەرەدى.
اباي وبلىسى,
ماقانشى اۋدانى