قىزىلوردا, تاراز, قوستاناي قالالارىنداعى نازارباەۆ زياتكەرلىك مەكتەبىنىڭ ۇستازدارى گۇلزات شىنتاسوۆا, ميرلان جۋسامباەۆ جانە الەكساندر شەرتسەر «قازاقستان مۇعالىمى» ۇلتتىق سىيلىعىنىڭ ءفيناليسى اتاندى. وسىلايشا ولار ەلىمىزدەگى ۇزدىك 10 پەداگوگتىڭ قاتارىنا ەندى.
كەلەسى جىلى NIS پەداگوگتەرى ءبىلىم بەرۋ سالاسىنداعى ەڭ بەدەلدى الەمدىك ناگرادالاردىڭ ءبىرى – Global Teacher Prize حالىقارالىق بايقاۋىندا قازاقستاننىڭ اتىنان قاتىسىپ, ەلىمىزدىڭ نامىسىن قورعايدى.
«مۇمكىندىگى مول ءبىلىم ورداسى». بۇل بەدەلدى بايقاۋىندا وق بويى وزىپ شىققان گۇلزات شىنتاسوۆانىڭ ۇرانى. ونىڭ ايتۋىنشا, بيىك بەلەستەردى باعىندىرۋ وڭاي بولماعان. 2011 جىلى ۋنيۆەرسيتەتتى بىتىرگەننەن كەيىن ول ءبىلىمىن ودان ءارى جەتىلدىرۋ ءۇشىن ماگيستراتۋراعا تۇسەدى. ال 2013 جىلى قىزىلوردادا نازارباەۆ زياتكەرلىك مەكتەبى اشىلىپ, پەداگوگ-ۇيىمداستىرۋشى-كۋراتور بولىپ جۇمىسقا ورنالاسادى. كەيىننەن مەكتەپتە ءوز ماماندىعى بويىنشا قىزمەتكە اۋىسقان.
گۇلزات بۋرابايقىزى — Bilim media group ۇيىمداستىرعان «جاڭاشىل ۇستاز – 2018» رەسپۋبليكالىق بايقاۋىنىڭ جەڭىمپازى, قىزىلوردا وبلىستىق «ورلەۋ» ورتالىعىنىڭ «پەداگوگيكالىق يدەيالار پانوراماسى» باقاۋىنىڭ ءى ورىن يەگەرى جانە تەرمين سوزدەردى قازاقشالاۋ بويىنشا رەسپۋبليكالىق بايقاۋدا باس جۇلدە جەڭىپ الدى.
سونداي-اق, ول «ادەبي ەسسە» ەلەكتيۆتى كۋرسىنىڭ اۆتورى, جالپى ءبىلىم بەرەتىن مەكتەپ مۇعالىمدەرىنە ارنالعان «ونلاين مەكتەپ» جوباسى تاپسىرمالارىن قۇراستىرۋشى, ءتىل ماسەلەسىنە قاتىستى ايماقتىق شارالاردىڭ تۇراقتى سپيكەرى, ء«تىل-قازىنا» ۇلتتىق عىلىمي-پراكتيكالىق ورتالىعىنىڭ لينگۆيست مامانى.
«مۇعالىم – بولاشاقتى جاساۋشى تۇلعا». قوستاناي قالاسىنداعى نازارباەۆ زياتكەرلىك مەكتەبىنىڭ ينفورماتيكا ءپانىنىڭ مۇعالىم-ساراپشىسى الەكساندر شەرتسەر – ءبىلىم بەرۋ باعدارلامالارى مەن ictlab.kz ءبىلىم بەرۋ پورتالىنىڭ نەگىزىن قالاۋشى. ول – NIS Online بىلىكتىلىكتى ارتتىرۋ كۋرستارى مەن تسيفرلىق پلاتفورماسىنىڭ بىرلەسكەن اۆتورى. «روبوتوتەحنيكا», Blended Teaching Program (Cambridge University), «پاندىك قۇزىرەتتىلىكتى دامىتۋ» سياقتى ءبىلىم بەرۋ باعدارلامالارىنىڭ سەرتيفيكاتتالعان ترەنەرى.
ول قر ۇكىمەتىنىڭ «جايلى مەكتەپ» جوباسىنىڭ پاندىك جۇمىس توبىن باسقارادى. سونىمەن بىرگە وسكەلەڭ ۇرپاقتى وقىتۋ مەن تاربيەلەۋدەگى ەلەۋلى جەتىستىكتەرى ءۇشىن ى.التىنسارين اتىنداعى مەدالمەن ماراپاتتالعان.
ول – «قازاق تىلىندە سويلەۋدى تانۋ جانە سينتەزدەۋ ۆيرتۋالدى داۋىستىق اسسيستەنتى» جانە «قازاق تىلىندە قۇراستىرىلعان Qazaq Oriented Language باعدارلامالاۋ ءتىلى» جوبالارىنىڭ اۆتورى.
«پەداگوگ ۇزدىكسىز ىزدەنىستە بولۋى كەرەك». ميرلان جۋسامباەۆ 2014 جىلدان باستاپ تاراز قالاسىنداعى NIS-تە فيزيكا ءپانىنىڭ مۇعالىم-ساراپشىسى بولىپ جۇمىس ىستەيدى. ول «نازارباەۆ زياتكەرلىك مەكتەپتەرى» دببۇ فيليالدارىنىڭ پەداگوگتەرى اراسىندا وتكەن «جىلدىڭ ۇزدىك مۇعالىمى – 2023» بايقاۋىندا جەڭىمپاز اتانعان.
CLIL (Content and Language Integrated Learning) بويىنشا سەرتيفيكاتتالعان ساراپشى رەتىندە جاراتىلىستانۋ-عىلىمي پاندەر مەن اعىلشىن ءتىلىن ينتەگراتسيالاۋ سالاسىندا زەرتتەۋلەر جۇرگىزەدى. ونىڭ زەرتتەۋ ناتيجەلەرى 2018 جىلى يتاليادا جانە 2022 جىلى ارمەنيادا وتكەن European Conference on Educational Research سياقتى حالىقارالىق كونفەرەنتسيالاردا, سونداي-اق دببۇ ۇيىمداستىرعان حالىقارالىق عىلىمي-پراكتيكالىق كونفەرەنتسياعا ۇسىنىلدى. ول – ءبىلىم بەرۋ سالاسىنداعى زەرتتەۋشىلەر قاۋىمداستىعىنىڭ (KERA) مۇشەسى.
قازىرگى ۋاقىتتا ونىڭ تانىمدىق بەينەروليكتەرى ميلليونداعان قارالىم جيناپ, وسى ارقىلى TikTok-تا عىلىمدى بەلسەندى تۇردە ناسيحاتتاپ كەلەدى.