بيىل ساۋىردە قر وقۋ-اعارتۋ مينيسترلىگىنىڭ قولداۋىمەن باستالعان «پەداگوگيكالىق يدەيالار پانوراماسى-2024» رەسپۋبليكالىق بەينەساباقتار مەن بەينەادىستەر كونكۋرسىنىڭ قورىتىندىسى شىقتى, دەپ جازادى Egemen.kz.
بايقاۋعا 5000 پەداگوگ قاتىسقان. ونىڭ ىشىندە 108 قاتىسۋشى جەڭىمپازدار قاتارىنان كورىندى.
بايقاۋ ايماقتىق جانە رەسپۋبليكالىق كەزەڭنەن ءوتتى. بەينەساباقتار 12 باعىت بويىنشا دايىندالعان. ولاردى وڭىرلىك ساراپتاما كەڭەسىنىڭ مۇشەلەرى جەتى كريتەري بويىنشا باعالادى.
«رەسپۋبليكالىق ساراپتامالىق كەڭەستەگى جۇمىسقا ورلەۋ وكىلدەرى مەن كونكۋرستىڭ باعىتتارى بويىنشا سىرتقى ساراپشىلار تارتىلدى. كونكۋرستىق جۇمىستاردى باعالاۋ ءراسىمى اشىق جانە شىنايى بولدى. رەسپۋبليكالىق كەزەڭ جۇلدەگەرلەرىنىڭ ءتىزىمى ءبىزدىڭ ورتالىق فيليالدارىنىڭ سايتىندا جانە رەسمي اككاۋنتتارىندا ورنالاستىرىلادى», دەدى «ورلەۋ» ۇلتتىق بىلىكتىلىكتى ارتتىرۋ ورتالىعىنىڭ باسقارما توراعاسى ايدانا شيليبەكوۆا. وسىلايشا, 108 پەداگوگ 1, 2, 3 دارەجەلى ديپلومدارعا يە بولدى. ءار باعىت بويىنشا YouTube-تە ەڭ كوپ قارالعان بەينەماتەريالداردىڭ اۆتورلارى انىقتالدى. سونىمەن قاتار, بيىل يۋنەسكو بايقاۋعا قاتىسۋشىلاردىڭ جۇمىستارىنا ءبىرىنشى رەت باعا بەرىپ, «جاھاندىق ازاماتتىق رۋحىندا ءبىلىم بەرۋ» جانە «كليماتتىق وزگەرىستەر سالاسىنداعى ءبىلىم بەرۋ» باعىتتارى بويىنشا ارنايى ماراپاتتار تابىستادى.