الماتى قالاسى ا.قارساقباەۆ اتىنداعى №41 مەكتەپتە باۋبەك بۇلقىشەۆ اتىنداعى سىيلىقتىڭ يەگەرى, بەلگىلى بالالار جازۋشىسى باقىت دوسىموۆتىڭ «مەيىربەكتىڭ كوگەرشىنى» اتتى اڭگىمەلەر جيناعىنىڭ تانىستىرىلىمى ءوتتى.
اۆتوردىڭ بالالارعا ارنالعان اڭگىمەلەرى جان تازالىعى مەن شىنايىلىقتى ناسيحاتتايدى. شىعارماداعى كەيىپكەرلەر تابيعات تازالىعىن ساقتاۋعا, كىتاپپەن دوس بولىپ بىلىمگە قىزىعۋعا جانە ۇلكەندەردى سىيلاي بىلۋگە, ءوز قاتارلاستارىمەن تاتۋ بولۋعا ۇندەيدى. ەڭ باستىسى وقىرماندى ويلاندىرادى. اتالعان كىتاپقا جازۋشىنىڭ ءىرىلى-ۇساقتى 23 اڭگىمەسى ەنگەن.
ءىس-شارا اياسىندا مەكتەپ كىتاپحاناشىسى الماگۇل دۇيسەنقىزى اۆتور شىعارماشىلىعىن وقۋشىلارعا تانىستىرىپ, پىكىر الماستى. «مەيىربەكتىڭ كوگەرشىنى» كىتابىنا شولۋ جاساپ, بالالار دا ويىن ورتاعا سالدى. وسىلايشا, مەكتەپ كىتاپحاناسىنىڭ قورى جازۋشىنىڭ 20 دانا كىتابىمەن تولىقتى.
حالىقارالىق «الاش» ادەبي سىيلىعىنىڭ لاۋرەاتى, اقىن بولات ۇسەنباەۆ كىتاپقا جازعان العىسوزىندە «باقىت – بالالار ادەبيەتىنىڭ قورجىنىنا ولجا سالعان قالامگەر. جازۋشى ءوزى ءومىر سۇرگەن داۋىرگە عانا ەمەس, بولاشاققا دا قىزمەت ەتەدى» دەگەن ەكەن. شىنىندا دا, باقىت دوسىموۆ شىعارمالارىنىڭ ەكىنشى ءومىرى باستالىپ كەتكەندەي...