پرەمەر-مينيستر ولجاس بەكتەنوۆ قوستاناي وبلىسىنا جۇمىس ساپارى بارىسىندا بىرنەشە زاۋىت, كاسىپورىنداردى ارالاپ, ءوندىرىس باسشىلىعى جانە ۇجىمدارىمەن كەزدەستى. كەزدەسۋ بارىسىندا ءوڭىردىڭ الەۋمەتتىك-ەكونوميكالىق دامۋى, كادرلىق الەۋەتتى ارتتىرۋ, ينفراقۇرىلىمدىق مىندەتتەردى شەشۋ بارىسى تالقىلاندى. سونىمەن قاتار بىرىڭعاي ۋاقىت بەلدەۋىنە كوشۋ ماسەلەسى دە ءسوز بولدى.
عىلىمي زەرتتەۋلەر نەگىزىندە شەشىم قابىلداندى
بىرىڭعاي ۋاقىت بەلدەۋىن ەنگىزۋ ماسەلەسىن قوستاناي وبلىسىنىڭ تۇرعىندارى بۇرىن دا كوتەرگەن. ويتكەنى بۇعان دەيىنگى 6-شى ۋاقىت بەلدەۋى تابيعي ۋاقىتقا سايكەس كەلمەدى. وسىلايشا, بىرىڭعاي ۋاقىت بەلدەۋىنە كوشۋ تۋرالى شەشىم كۇندەلىكتى تۇرمىستىق ۇدەرىستەردى جەڭىلدەتتى. وسىعان بايلانىستى كەزدەسۋگە قاتىسۋشىلار بىرىڭعاي ۋاقىت بەلدەۋىن قولداپ ءسوز سويلەدى.
پرەمەر-مينيستر تۇرعىندارمەن اڭگىمەلەسۋ بارىسىندا تابيعي ۋاقىتتىڭ ازاماتتاردىڭ دەنساۋلىعى مەن ءال-اۋقاتىنا وڭ اسەرى عىلىمي دالەلدەنگەنىنە توقتالا كەلىپ, وبلىس تۇرعىندارى مەن بارشا ەل ازاماتتارىنا اتالعان ماڭىزدى شەشىمدى ءتۇسىنىپ, قولداعانى ءۇشىن العىس ءبىلدىردى.
«شەشىم قازاقستاندا عانا ەمەس, شەتەلدەردە دە جۇرگىزىلگەن وتە تەرەڭ عىلىمي زەرتتەۋلەر نەگىزىندە قابىلداندى. 2017 جىلى امەريكالىق عالىمدار توبى ادامنىڭ تسيركادتىق ىرعاعىن زەرتتەگەنى ءۇشىن نوبەل سىيلىعىمەن ماراپاتتالدى. بۇل زەرتتەۋدە عالىمدار تابيعي ۋاقىتتا ءومىر سۇرگەن كەزدە ادام ءۇشىن ەڭ جاقسى جانە پايدالى ەكەنىن دالەلدەدى. سوندىقتان قازىر الەمنىڭ پروگرەسسيۆتى ەلدەرى تابيعي ۋاقىت بەلدەۋىنە كوشۋگە ۇمتىلۋدا. قازاقستان ءۇشىن تابيعي ۋاقىت بەلدەۋى – ءبىز قازىر ءومىر ءسۇرىپ جاتقان UتC+5 بولىپ تابىلادى. بۇرىن وزدەرىڭىز بىلەتىندەي, ءبىز باسقا UتC+6 بەلدەۋىندە بولدىق. كەزىندە ەلىمىز ديرەكتيۆالىق تارتىپتە ءبىز ءۇشىن تابيعي ەمەس بەلدەۋگە اۋىستىرىلدى. قازىر, كەرىسىنشە, ءبىز ۋاقىتتى كۇن تسيكلىنە سايكەس كەلتىردىك. مەن بىرىڭعاي ۋاقىت بەلدەۋىنە
اۋىسۋ كەيبىر ادامدارعا ىڭعايسىزدىق تۋدىرۋى مۇمكىن ەكەنىن تۇسىنەمىن. اعزا بىرتىندەپ ۇيرەنەدى. وسىنداي شەشىم قابىلداندى. ەگەر وڭىرلەردە قانداي دا ءبىر قولايسىزدىقتار بولسا, ءبىزدىڭ ەڭبەك زاڭنامامىز مۇمكىندىك بەرەتىن ينفراقۇرىلىمدى, جارىقتاندىرۋدى, ىڭعايلى كەستەنى ۇيىمداستىرۋ ارقىلى جۇمىس ىستەۋ قاجەت. وسى ماسەلەلەردىڭ بارلىعىن ءارى قاراي شەشەمىز», دەدى پرەمەر-مينيستر.
التى بىردەي ءىرى يندۋستريالىق جوبا ىسكە اسىرىلدى
ۇكىمەت باسشىسى پرەزيدەنت جولداۋىندا ايتىلعان ونەركاسىپ سالاسىن دامىتۋ, جوعارى قايتا وڭدەۋدى يگەرۋ جانە لوكاليزاتسيا دەڭگەيىن ارتتىرا ءتۇسۋ جونىندەگى تاپسىرمالاردىڭ ورىندالۋ بارىسىن تەكسەردى.
پرەمەر-مينيسترگە بيىلعى 11 ايدا قوستاناي وبلىسىندا ونەركاسىپ ءونىمىن ءوندىرۋ كولەمى 2,5 ترلن تەڭگەگە جەتكەنى, وڭدەۋ ونەركاسىبىنىڭ ۇلەسى 72%-دان اسقانى باياندالدى. وسى جىلى وڭىردە قۇنى 124,7 ملرد تەڭگە بولاتىن 6 يندۋستريالىق جوبا ىسكە اسىرىلىپ, 1 301 جۇمىس ورنى اشىلدى.
«Caspian Steel QZ» ارماتۋرا زاۋىتىنا بارعان ولجاس بەكتەنوۆ كاسىپورىنداعى تەحنولوگيالىق ۇدەرىسپەن جانە كومپانيانىڭ بولات دايىنداماسىن شىعاراتىن جاڭا زاۋىت سالۋ جونىندەگى جوسپارىمەن تانىستى. ارماتۋرا زاۋىتى جىلىنا 450 مىڭ توننا ءونىم شىعارادى. مىسالى, بيىلعى 10 ايدىڭ ىشىندە 311,4 مىڭ توننا بولات يلەم جانە 10,9 مىڭ توننا مەتالل سىنىقتارى ءوندىرىلدى. زاۋىت ونىمدەرى ىشكى قاجەتتىلىكتەردى وتەپ قانا قويماي, سىرتقى نارىققا دا شىعارىلادى. ماسەلەن, جىل باسىنان بەرى 32 ملرد تەڭگەدەن استام سوماعا 112,6 مىڭ توننا ۇساق سۇرىپتى يلەم ەكسپورتتالعان.
كومپانيا باسشىلىعى جوسپارلاپ وتىرعان بولات بۇيىمدار وندىرەتىن جاڭا كاسىپورىننىڭ بولجامدى قۋاتى جىلىنا 1 ملن توننانى قۇرايدى. «Caspian Group» كومپانياسىنىڭ ديرەكتورى الەكساندر كيم جوباعا 650 ملن دوللار ينۆەستيتسيا سالۋ جوسپارلانعانىن ايتتى. زاۋىت ىسكە قوسىلعان سوڭ, 600 ادام جۇمىسپەن قامتاماسىز ەتىلىپ, مەردىگەر ۇيىمداردا تاعى 400 جۇمىس ورنى اشىلادى. كاسىپورىندا جاھاندىق «جاسىل» ەكونوميكاعا كوشۋ شەڭبەرىندە قورشاعان ورتاعا اسەرىن بارىنشا ازايتاتىن سوڭعى بۋىنداعى ەلەكتر دوعالى پەشتەردى پايدالانۋ جوسپارلانىپ وتىر. جوبانى جۇزەگە اسىرۋ شىعارىلاتىن تۇپكىلىكتى ونىمدەگى وتاندىق قامتۋدى 99%-عا دەيىن ارتتىرا وتىرىپ, ارماتۋرا جاساۋ ءوندىرىسىن لوكاليزاتسيالاۋعا مۇمكىندىك بەرەتىنى ايتىلدى. سونىمەن قاتار وڭىردەگى وڭدەۋ ونەركاسىبىنىڭ ۇلەسى 12,3%-عا ارتادى.
و.بەكتەنوۆ ينۆەستيتسيالىق جوبانىڭ ماڭىزدىلىعىنا توقتالىپ, ءىرى يندۋستريالىق وندىرىستەر توڭىرەگىندە شاعىن جانە ورتا بيزنەس بەلدەۋىن قالىپتاستىرۋ قاجەتتىگىن ايتتى.
«پرەزيدەنت ۇكىمەتكە ەكونوميكالىق ءوسۋدىڭ جاڭا كوزدەرىن تابۋ تۋرالى ناقتى مىندەت قويدى. ءاربىر ءوڭىردىڭ وزىندىك كۇشتى جاقتارى بار جانە ءبىز وبلىستىڭ, ەلىمىزدىڭ ەكونوميكاسىنا جانە جالپى حالىقتىڭ ءال-اۋقاتىن جاقسارتۋ جۇمىستارىندا ناقتى وسىمگە قول جەتكىزەتىن الەۋەتتى بارىنشا اشۋعا تىرىسامىز. ءبىز تاڭداعان ەكونوميكالىق پاتريوتيزم جولى جاڭا وتاندىق زاۋىتتار مەن وندىرىستەر تۇرىندە ءوز جەمىسىن بەرۋدە, ولار ءوز كەزەگىندە اينالاسىندا تاعى ءبىر شوب بولىگىن دامىتۋدا. مۇنىڭ بارلىعى وتاندىق ەكونوميكانىڭ ءوزىن-ءوزى قامتاماسىز ەتۋىن ارتتىرۋعا جانە ءونىمدى جۇمىس ورىندارىن قۇرۋعا مۇمكىندىك بەرەدى», دەدى پرەمەر-مينيستر.
ۇكىمەت باسشىسى ودان كەيىن جىلىنا 45 مىڭ توننا جۇك كولىكتەرىنە ارنالعان شويىن قۇيمالارىن وندىرەتىن «KamLitKZ» زاۋىتىنا بارىپ, قارا مەتاللۋرگيانىڭ دامۋىمەن تانىستى. پرەمەر-مينيسترگە نەگىزگى تەحنولوگيالىق ۇدەرىس اۆتوكولىك بولشەكتەرىن ءوندىرۋدىڭ تولىق تسيكلىن قامتيتىنى جانە ءونىمنىڭ حالىقارالىق ساپا ستاندارتتارىنا سايكەس كەلۋىن قامتاماسىز ەتەتىنى باياندالدى. 2025 جىلى قۋاتتى جىلىنا 75 مىڭ ونىمگە دەيىن جەتەتىن دالمە-ءدال شتامپتاۋدىڭ وزىق تەحنولوگيالارىن قولداناتىن ەكىنشى زاۋىتتى ىسكە قوسۋ جوسپارلانعان.
بۇگىندە قوستاناي وبلىسى ماشينا جاساۋ سالاسى بويىنشا رەسپۋبليكادا كوش باستاپ تۇر. پرەمەر-مينيسترگە «Kia» اۆتوكولىگىن وندىرەتىن زاۋىت سالىنىپ جاتقان يندۋستريالىق ايماق اۋماعىندا وڭىردەگى اۆتوموبيل جاساۋ قارقىنى تۋرالى باياندالدى. جوبانىڭ جالپى قۇنى 200 ملن دوللارعا باعالانىپ وتىر, ونىڭ 80%-عا جۋىعى تىكەلەي شەتەلدىك ينۆەستيتسيا. كاسىپورىندى 2025 جىلى ىسكە قوسىلادى دەپ جوسپارلانعان. بۇگىندە نەگىزگى وندىرىستىك كورپۋستى سالۋ, ىرگەتاسىن قالاۋ, سونداي-اق مەتالل كونسترۋكتسيالارىن مونتاجداۋ جۇمىستارى اياقتالدى. ولجاس بەكتەنوۆكە لاك-بوياۋ ءوندىرىسىن, ونىڭ ىشىندە پوليمەرلى جابىنداردىڭ بارلىق تۇرلەرىن لوكاليزاتسيالاۋدىڭ جوعارى دەڭگەيىن قامتاماسىز ەتەتىن ءوندىرىستى قۇرۋ جوسپارلارى تۋرالى باياندالدى. زاۋىتتىڭ تولىق جوبالىق قۋاتى جىلىنا 70 مىڭ اۆتوكولىكتى قۇرايدى. كاسىپورىن ونىمدەرى شاعىن توراپتى قۇراستىرۋ ءادىسىن قولدانا وتىرىپ شىعارىلادى. ءوندىرىس 68 روبوتپەن جابدىقتالادى. زاۋىت ىسكە قوسىلعاندا جوعارى اقى تولەنەتىن 1,5 مىڭ جاڭا جۇمىس ورنى اشىلادى.
پرەمەر-مينيستر ەلىمىزدەگى اۆتوموبيل شىعاراتىن جەتەكشى كاسىپورىنداردىڭ ءبىرى «سارىارقااۆتوپروم» كومپانياسىنىڭ وندىرىستىك قۋاتىن قاراپ شىعىپ, تولىق تسيكل بويىنشا اۆتوكولىكتەر قۇراستىرۋدىڭ تەحنولوگيالىق ەرەكشەلىكتەرىمەن تانىستى. زاۋىتتىڭ باس ديرەكتورى سىرىم سەمەيباەۆ 2024 جىلى شىعارىلاتىن ءونىم كولەمىن 90 مىڭ اۆتوموبيلگە جەتكىزۋ جوسپارلانىپ وتىرعانىن ايتتى. كاسىپورىن «JAC», «Kia», «Chevrolet», «Jetour», «Hongqi», «Skoda» سياقتى برەندتەرىن شىعارىپ جاتىر.
پرەمەر-مينيستر ءوندىرىستى كەڭەيتۋ بىلىكتى كادرلاردى دايارلاۋ جانە يندۋستريالىق جوبالاردى ىسكە اسىرۋعا جاستاردى تارتۋ بويىنشا قاتار جۇرگىزىلەتىن جۇمىستارمەن سۇيەمەلدەنۋگە ءتيىس ەكەنىنە توقتالدى. وعان كاسىپتىك-تەحنيكالىق ءبىلىم بەرۋ, سونداي-اق «WorldSkills Kazakhstan» شەبەرلىك چەمپيوناتىنىڭ الاڭى ءتيىمدى تەتىك بولىپ سانالادى. ولجاس بەكتەنوۆ سونىمەن قاتار كاسىپورىنداردىڭ تيىمدىلىگى مەن شىعارىلاتىن ءونىم كولەمىن ارتتىرۋعا باعىتتالعان تسيفرلىق شەشىمدەردى وندىرىسكە ەنگىزۋدىڭ ماڭىزدى ەكەنىن اتاپ ءوتتى.
قوستاناي وبلىسى