قازاقستان تەمىر جولىنىڭ قاۋىپسىزدىگىنە قارۋلى كۇزەتكە قارجىلاندىرۋ مەن رەسۋرستىڭ جەتىسپەۋى سالدارىنان ەلەۋلى قاۋىپ ءتونىپ تۇر. سەناتور گەننادي شيپوۆسكيح دەپۋتاتتىق ساۋالىندا اسكەريلەندىرىلگەن تەمىرجول كۇزەتىنىڭ قىزمەتكەرلەرى تاپ بولىپ وتىرعان ماسەلەنى كوتەردى, دەپ حابارلايدى Egemen.kz.
دەپۋتاتتىڭ پىكىرىنشە, سوڭعى جىلدارى جۇك تاسىمالى كولەمىنىڭ وسۋىنە قاراماستان, كۇزەتتىڭ تيىمدىلىگى تومەن دەڭگەيدە قالىپ وتىر. سوڭعى ون جىلدا كۇزەت قىزمەتكەرلەرىنىڭ 40%-عا قىسقارۋى قالعان قىزمەتكەرلەرگە جۇكتەمەنى ەداۋىر ارتتىرىپ جىبەرگەن. بۇرىن, ەگەر كۇزەتشى اۋىسىمدا ورتا ەسەپپەن 10-15 كم جۇرسە, بۇگىندە قىزمەت كورسەتۋ شارتىنا قاراماستان شامامەن 20-30 كم ءجۇردى.
گەننادي شيپوۆسكيح كولىك ينفراقۇرىلىمىن قورعاۋ ءۇشىن قوسىمشا رەسۋرستار مەن اسكەريلەندىرىلگەن تەمىرجول كۇزەتىنىڭ مارتەبەسىن كۇشەيتۋ قاجەت ەكەنىن اتاپ ءوتتى.
«تەمىرجولداعى قاۋىپسىزدىكتى قامتاماسىز ەتىپ جۇرگەن مەكەمە – قتج ۇلتتىق كومپانياسىنىڭ «اسكەريلەندىرىلگەن تەمىر جول كۇزەتى». 7 مىڭنان استام قىزمەتكەرى بار بۇل مەكەمە, كۇن سايىن جارىلعىش ماتەريالداردى, وتىن مەن حيميالىق زاتتاردى قوسا العاندا, ترانزيتتىك, ەكسپورتتىق, يمپورتتىق جانە ىشكى جۇكتەرى بار 45 مىڭعا جۋىق ۆاگوندى كۇزەتەدى. مىسالى, قىتاي, رەسەي, قىرعىزستان, وزبەكستان, ازەربايجان جانە باسقا دا ەلدەر بۇل مىندەتتەردى مەملەكەتتىك باقىلاۋداعى نەمەسە ونىمەن تىعىز بايلانىستى مامانداندىرىلعان قۇرىلىمدارعا جۇكتەيدى. ءبىزدىڭ ەلىمىزدە ۇكىمەت تاراپىنان بۇل سەكتور نازاردان تىس قالىپ وتىر, ەلدىڭ كولىك-لوگيستيكالىق الەۋەتىن دامىتۋ جانە نىعايتۋ بويىنشا مەملەكەتتىك ساياساتتى تولىققاندى ىسكە اسىرۋ ءۇشىن اسكەريلەندىرىلگەن تەمىر جول كۇزەتىنىڭ ءتيىستى مارتەبەسى جوق. وسىعان بايلانىستى وسى كومپانياعا قاجەتتى مارتەبە بەرۋ ماسەلەسىن پىسىقتاۋعا, وسى قۇرىلىمدى تەحنيكالىق كۇشەيتۋ ءۇشىن جەتكىلىكتى قارجىلاندىرۋمەن قامتاماسىز ەتۋ ماسەلەسىن قاراۋعا شاقىرامىز», دەدى دەپۋتات.