سارسەنبى كۇنى استانا ماڭىنداعى №68665 اسكەري ءبولىم بازاسىندا س.سەيفۋللين اتىنداعى قازاق مەملەكەتتىك اگروتەحنيكالىق ۋنيۆەرسيتەتى اسكەري كافەدراسى ستۋدەنتتەرىنىڭ روتالىق-تاكتيكالىق جاتتىعۋلارى ءوتتى. بولاشاق وفيتسەرلەر مەن كىشى وفيتسەرلەردىڭ (سەرجانت) اسكەري جاتتىعۋلارىنا قورعانىس مينيسترىنىڭ ورىنباسارى, گەنەرال-مايور نۇرلان جولامانوۆ كەلىپ, ارنايى باعا بەردى.
– بۇگىنگى اسكەري دايىندىق وتە جاقسى دەپ ايتۋعا بولادى. ستۋدەنتتەردىڭ شىن كوڭىلمەن جاتتىعۋعا كىرىسكەندەرى مەنى قاتتى قۋانتىپ وتىر. وتان قورعاۋ ەر جىگىتتىڭ باستى ازاماتتىق پارىزى دەسەك, اتالعان وقۋ-جاتتىعۋ جيىنى ەلىن, جەرىن شىن ءجۇرەكپەن سۇيەتىن ەل قورعاندارىنىڭ ءوسىپ كەلە جاتقاندىعىن تاعى ءبىر قىرىنان كورسەتتى. ءبىز وسىعان قۋانامىز, – دەدى قورعانىس ۆيتسە-ءمينيسترى.
بيىل ەلىمىزدە 22 جوعارى وقۋ ورنى جانىنداعى اسكەري كافەدرا ستۋدەنتتەرىنىڭ وقۋ جيىندارىن ءوتكىزۋ جوسپارلانعان. ول ءۇشىن ارنايى ۋاقىت ءبولىنىپ, وعان 4000-نان استام ادام تارتىلعان. اتالعان جيىنداردا ستۋدەنتتەر كافەدرادا العان تەوريالىق ءبىلىمدەرىن تاجىريبە جۇزىندە پىسىقتايدى. جيىن بارىسىندا ستۋدەنتتەرگە بىلىكتى اسكەري تاجىريبەلىك تالىمدەر بەرىلمەك.
ءابدىراحمان قىدىربەك, استانا.