باحرەيننىڭ يسا تاۋن قالاسىندا ارالاس جەكپە-جەكتەن «Brave 91» ءتۋرنيرى ءوتتى. وسى جارىستا اسا جەڭىل سالماق دارەجەسىندە ونەر كورسەتىپ جۇرگەن دياس ەرەنعايىپوۆ وكتاگونعا شىقتى.
دياس وسى كۇنگە دەيىن 14 كەزدەسۋ وتكىزىپ, سونىڭ ۇشەۋىندە عانا ەسە جىبەردى. سوڭعى رەت وسىدان بەس جىل بۇرىن رەسەيلىك الەكسەي شاپوشنيكوۆتەن ۇپاي سانىمەن ۇتىلدى. سودان كەيىن قاتارىنان التى جەكپە-جەكتە جەڭىسكە جەتتى. پارسى شىعاناعىنداعى قارسىلاسى دا وسال ەمەس ەدى. برازيليالىق مارچيانو فەررەيرانىڭ رەكوردى – 16 باسەكە, 10 جەڭىس, 3 جەڭىلىس. ەكەۋى دە ءوز ايقاستارىنىڭ 70 پايىزىن ايقىن باسىمدىقپەن اياقتاعان.
باسەكە باستالعان بەتتە فەررەيرا شابۋىلعا شىقتى. بىراق دياس ونىڭ ەركىن ويقاستاۋىنا مۇمكىندىك بەرمەي, بىردەن كۇرەس ادىسىنە سالدى. ءبىرىنشى راۋندتىڭ وزىندە ونى ءتورت-بەس رەت باسى مەن كەۋدەسىنەن اسىرا لاقتىرىپ, جەرگە قادادى. ادەتتە برازيليالىق دجيۋ-دجيتسۋدىڭ شەبەرلەرى ۇستاسقاندا ەشكىمگە دەس بەرمەيدى, بۇل جولى ولاي بولمادى. وڭتۇستىك امەريكانىڭ وعىلانى قازاق بالۋانىنا جارىتىپ قارسىلىق كورسەتە العان جوق. مارچيانو ۇنەمى دياستىڭ استىندا جاتتى. وسى كورىنىس ءۇش راۋند, ياعني 15 مينۋت بويى جالعاستى. فەررەيرانى ءارى دە, بەرى دە لاقتىرىپ, ابدەن سىلىكپەسىن شىعارعان د.ەرەنعايىپوۆتىڭ مىقتىلىعىن تورەشىلەر ءبىراۋىزدان مويىندادى.