قوستاناي وبلىسىندا تاس جولدىڭ بىرىندە جول اپاتىنان ءۇش ادام قازا تاۋىپ, تاعى ۇشەۋى زارداپ شەكتى, دەپ حابارلايدى Egemen.kz «ناشا گازەتا» باسىلىمىنا سىلتەمە جاساپ.
باسىلىم جول-كولىك وقيعاسىنىڭ دۇيسەنبى, 16 جەلتوقسان كۇنى ءتۇس اۋا قوستاناي-اۋليەكول-سۇرعان تاس جولىندا بولعانىن جازادى. قاراسۋ اۋدانى, حەرتسەنو اۋىلىنان 10 شاقىرىم جەردە Volvo جانە Toyota Alphard كولىكتەرى سوقتىعىسقان.
«جول اپاتى سالدارىنان ءۇش ادام العان جاراقاتتارىنان وقيعا ورنىندا كوز جۇمدى, تاعى ۇشەۋى اۋليەكول اۋداندىق اۋرۋحاناسىنا جاتقىزىلدى», دەپ حابارلادى قوستاناي وبلىسى ءىىد ءباسپاسوز قىزمەتى.
اجال قۇشقانداردىڭ بارلىعى Toyota Alphard ميكرواۆتوبۋسىندا بولعانى انىقتالدى.
پوليتسەيلەر قىلمىستىق كودەكستىڭ 345-بابى (ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جول قوزعالىسى ەرەجەلەرىن بۇزۋ) بويىنشا تەرگەۋدى باستادى.