71 كەلىدە ازيا چەمپيوناتىنىڭ التىن مەدالى ابىلايحان جۇسىپوۆكە بەرىلەتىن بولدى. قازاقستان بوكس فەدەراتسياسىنىڭ نارازىلىق حاتىنان كەيىن IBA جانە ASBC ۇيىمدارى رەسمي حات جولدادى, دەپ جازادى Egemen.kz.
حالىقارالىق بوكس ۇيىمدارىنىڭ رەسمي حابارلاماسىندا ابىلايحان ءجۇسىپوۆ پەن حاۆاسبەك اسادۋللاەۆ اراسىندا وتكەن جەكپە جەكتە وزبەكستاندىق بوكسشى تاراپىنان سپورتتىق ەرەجە ورەسكەل تۇردە بۇزىلعانى ايتىلعان. سوندىقتان وزبەكستانعا كەتكەن التىن جۇلدە قازاق بوكسشىسى ابىلايحان ءجۇسىپوۆتىڭ ەنشىسىنە جازىلادى. وسىلايشا, وتانداسىمىز ءبىر كۇن كەشىگىپ ازيا چەمپيونى اتانىپ وتىر.
رەسمي حاتتا شارشى الاڭدا تورەلىك ەتكەن سەربيالىق دجوۆانا ۋگرەنوۆيچتىڭ دە قاتەلىككە بوي الدىرعانى اتاپ وتىلگەن. ال قازاقستان تاراپى بوكس ەرەجەلەرىنىڭ ورەسكەل بۇزىلعانىن ايقىندايتىن فوتو-ۆيدەو دايەكتەر بار ەكەنىن ەسكە سالعان.
«ناتيجەسىندە IBA جانە ASBC ۇيىمدارى وسى سالماقتاعى اقتىق سىندى قايتا قاراستىرىپ, كەلەسى شەشىمگە كەلدى. 71 كەلىدە ابىلايحان ءجۇسىپوۆ ازيا چەمپيونى دەپ تانىلدى, ال وزبەكستاندىق بوكسشى بەلگىلى مەرزىمگە جارىستاردان شەتتەتىلەدى», دەلىنگەن IBA جانە ASBC ۇيىمدارى جولداعان رەسمي حاتتا.