«ەگەمەن قازاقستان» گازەتىنىڭ ۇجىمى ونەگە تۇتار اعا بۋىن وكىلى – ءادىل دۇيسەنبەك.
ول قازمۋ-ءدىڭ سوڭعى كۋرسىندا «سوتسياليستىك قازاقستان» (قازىرگى «ەگەمەن قازاقستان») گازەتىنە كىشى ادەبي قىزمەتكەر بولىپ ورنالاستى. سودان باسىلىمدا 36 جىل ەڭبەك ەتىپ, زەينەتكەرلىككە شىقتى. ءبولىم مەڭگەرۋشىسى, رەداكتسيا القاسىنىڭ مۇشەسى بولدى. سونىمەن بىرگە قازاق رۋحانياتىنا «اق كۇمبەز», «جۇرەك جىلۋى», «تەرگەۋ ءəلى بىتكەن جوق», «كوكجيەك», «قارا شاڭىراق, «شەراعامنىڭ شەرۋى» اتتى كىتاپتارىمەن ولجا سالدى. اقيقاتتى تۋ ەتكەن قالامگەردىڭ ونەگەلى ءومىرى كەيىنگى جاس ۇرپاققا زور تاعىلىم.
ەردىڭ سويى – ەراعاڭ
باس باسىلىمدى ارقا توسىنە باستاپ كەلگەن ەرجۇمان سمايىل «ەگەمەن قازاقستانعا» 25 جىل بويى ماڭداي تەرى سىڭگەن كورنەكتى جۋرناليست. ول – بۇقارالىق اقپارات قۇرالدارى سالاسىنداعى پرەزيدەنت سىيلىعىنىڭ تۇڭعىش لاۋرەاتى, قازاقستاننىڭ ەڭبەك سىڭىرگەن قايراتكەرى.
ايتۋلى قالامگەردىڭ ماقالالارى قوعامداعى قوردالى ماسەلەلەردى دەر كەزىندە شەشىپ, ەل تاۋەلسىزدىگىن نىعايتۋعا زور ۇلەس قوستى. جاقسىلار مەن جايساڭداردىڭ جالعاسى بولعان ول سوڭىنان ەرگەن جاس تولقىنعا قامقورلىق كورسەتىپ, قاناتتاندىردى. سوندىقتان شاكىرتتەرىنىڭ ءبارى ونى «ەردىڭ سويى – ەراعاڭ» دەپ قۇرمەتپەن ەسكە الادى.
قوعامشىل قالامگەر
«ەگەمەندە» ەلدىك ماسەلەلەردى قوزعاعان ماقالالارىمەن وقىرماننىڭ ىقىلاسىنا بولەنىپ, قوعامدىق پىكىردىڭ ورنىعۋىنا ىقپال ەتكەن قالامى جۇيرىك ءجۋرناليستىڭ ءبىرى جىلقىباي جاعىپار ۇلى ەدى.
جىلقىباي جاعىپار ۇلىنىڭ بايىرعى تسەلينوگراد وبلىسىندا قازاق مەكتەپتەرىن اشۋ ءىسى مەن اقمولادا نەمىس اۆتونومياسىن قۇرۋ ماسەلەسى تۋىنداعاندا, الماس قىلىشتاي جارقىلداپ العا شىققانى ارقا قازاعىنا جاقسى تانىس. وڭىردە رەسپۋبليكالىق ء«تىل جانە مادەنيەت» قوعامىنىڭ قۇرىلۋىنا مۇرىندىق بولىپ, ۇيىمداستىرۋ كوميتەتىنىڭ توراعاسى بولدى. ول – «زار-نالا», «كەك», «قالام كيەسى», ء«ۇمىت تولقىنى», «ۇلت ۇياسىنداعى ۇلاعات» كىتاپتارىنىڭ اۆتورى. ەشكىمدى جاتىرقاماي, جاتسىنباي, ءار قازاقتى باۋىرىنداي سۇيگەن جىلقىباي اعانىڭ ارلى اماناتى – بارشامىزعا ورتاق پارىز.