قاسىم-جومارت توقاەۆ تالدىقورعان قالاسىنىڭ ىرگەسىندەگى ىنتىماق اۋىلىندا بيىل پايدالانۋعا بەرىلگەن №30 مەكتەپتى ارالاپ كوردى, دەپ حابارلايدى Egemen.kz.
1200 وقۋشىعا ەسەپتەلگەن ءبىلىم وشاعىنىڭ قۇرىلىسى جەرگىلىكتى بيۋدجەتتىڭ جانە ءبىلىم بەرۋ ينفراقۇرىلىمىن قولداۋ قورىنىڭ ەسەبىنەن قارجىلاندىرىلعان.
زاماناۋي ۇلگىدە جابدىقتالعان مەكتەپتە 77 وقۋ كابينەتى, مۋلتيمەديا سىنىپتارى, سپورت, گيمناستيكا, ءماجىلىس پەن كىتاپحانا زالدارى, اعاش, مەتالل جانە تىگىن شەبەرحانالارى بار.
پرەزيدەنت جاڭا وقۋ ورداسىن ارالاپ كورىپ, وقۋشىلارمەن اڭگىمەلەستى. مەملەكەت باسشىسى مەكتەپكە اۆتوبۋس سىيعا تارتتى.
جالپى, بيىل جەتىسۋ وبلىسىندا 3 جاڭا مەكتەپ اشىلعان. ونىڭ ىشىندە ەكەۋى «جايلى مەكتەپ» ۇلتتىق جوباسى اياسىندا سالىندى. اتاپ ايتقاندا, پانفيلوۆ اۋدانىنىڭ جاركەنت قالاسىندا 1200 ورىندىق, كوكسۋ اۋدانىنىڭ قاراتال اۋىلىندا شاعىن جيناقتى مەكتەپ پايدالانۋعا بەرىلدى. قازىرگى كەزدە وبلىس بويىنشا 5 ءبىلىم وشاعىنىڭ قۇرىلىسى جۇرگىزىلىپ جاتىر.