ايبەك ورالباي بوكستان ازيا چەمپيونى اتاندى

ايبەك ورالباي (92+ كگ) تايلاندتا ءوتىپ جاتقان ازيا چەمپيوناتىنىڭ فينالىندا قىتايلىق ابۋدۋرەكسيتي رەمۋلانى 5:0 ەسەبىمەن جەڭدى.

سونىمەن قازاقستان ەرلەر قۇراماسى ەكىنشى ورىنعا تۇراقتادى. قۇراما ءسپورتشىلارى تورت التىن, بەس كۇمىس جانە ءبىر قولاعا قول جەتكىزدى.

بۇعان دەيىن بوكستان قازاقستان ەرلەر قۇراماسىنىڭ ازيا چەمپيوناتىنداعى التىنشى التىنىن 54 كەلى سالماقتا ماحمۇد سابىرحان جەڭىپ العان بولاتىن. قازاقستان قۇراماسى ءۇشىن جەتىنشى جوعارى جۇلدەنى بەكزات نۇرداۋلەتوۆ 86 كەلى سالماقتا وزبەكستاندىق جاسۋربەك يۋلدوشەۆپەن جەكپە-جەگىندە جەڭىپ الدى. سونداي-اق ساعىندىق توعامباي قارسىلاسى تاجىكستان وكىلى پارۆيز كاريموۆتى مەرزىمىنەن بۇرىن جەڭىپ, ەلگە سەگىزىنشى التىندى سىيلادى. 

48 كەلىگە دەيىنگى سالماقتا ونەر كورسەتكەن سانجار تاشكەنباي ازيا چەمپيوناتىنىڭ كۇمىس جۇلدەگەرى اتانسا, ورازبەك اسىقۇلوۆ چەمپيوندىق بەلبەۋ ءۇشىن بەلدەسۋدە وزبەكستاندىق ميرازيزبەك ميرزاحاليلوۆتان جەڭىلىپ قالدى.

قازاقستاندىق دۋلات بەكباۋوۆ وزبەكستاندىق مۋجيبيللو تۇرسىنوۆتان ۇتىلىپ, كۇمىس جۇلدەگەر اتاندى. ابىلايحان ءجۇسىپوۆ قازاقستان قۇراماسىنىڭ قورجىنىنا تاعى ءبىر كۇمىس قوسسا, دياس مولجىگىتوۆ فينالدا وزبەكستاندىق قارسىلاسىن جەڭە الماي, بەسىنشى كۇمىستى جەڭىپ الدى.

ال بوكستان قازاقستان ايەلدەر قۇراماسى ازيا چەمپيوناتىندا بەس التىن, بەس قولا مەدال جەڭىپ الدى.