جاستاردى رەپرودۋكتيۆتى دەنساۋلىق تۋرالى حابارمەن اقپاراتتاندىرىپ جۇرگەن «جاستار دەنساۋلىعىن ساقتاۋ – «Saulyq.life» قوزعالىسىنىڭ بەلسەندىلەرى جىل بويى اتقارعان جۇمىسىن رەسپۋبليكالىق فورۋمدا تۇيىندەدى.
«جاستار دەنساۋلىعىن ساقتاۋ – «Saulyq.life» قوزعالىسى بىلتىر مادەنيەت جانە اقپارات مينيسترلىگىنىڭ, ازاماتتىق باستامالاردى قولداۋ ورتالىعىنىڭ قولداۋىمەن قۇرىلعان. قوزعالىستىڭ مىندەتى – جىنىستىق تاربيە مەن رەپرودۋكتيۆتى دەنساۋلىق تۋرالى جاستاردى اقپاراتتاندىرۋعا باعىتتالعان. اقپاراتتىق قۇرالداردىڭ كومەگىن پايدالانىپ, جاسوسپىرىمدەر اراسىنداعى جۇكتىلىكتىڭ, تۇسىك جاساتۋدىڭ, جاستار مەن جىنىستىق جەتىلۋ جاسىنداعى بالالار اراسىندا جىنىستىق قاتىناس ارقىلى جۇعاتىن اۋرۋلاردىڭ سانىن ازايتۋعا ىقپال ەتۋگە بولادى.
«Saulyq.life» قوزعالىسىنىڭ ساراپشىلارى جۇرگىزگەن زەرتتەۋ ناتيجەسىنە ۇڭىلسەك, ەل جاستارىنىڭ رەپرودۋكتيۆتى دەنساۋلىق ماسەلەلەرىنە دەگەن قىزىعۋشىلىعى 2022 جىلمەن سالىستىرعاندا 24,7 پايىزعا ارتقان. «جاستار دەنساۋلىعىن ساقتاۋ – «Saulyq.life» قوزعالىسىنىڭ جەتەكشىسى قانات مىرحايداروۆتىڭ ايتۋىنشا, جاستار وسى تاقىرىپقا قىزىعۋشىلىق تانىتىپ, ءجىتى ىزدەنەدى. بۇعان ارنايى ءانونيمدى Telegram بوتىنا كەلەتىن سۇرانىستار سانىنىڭ ارتۋى دالەل. ءبىر جارىم جىل ىشىندە «Saulyq.life»-تىڭ پسيحولوگتەرى مەن مەديتسينا ماماندارى جاستاردىڭ 350-دەن استام ءوتىنىشىن قاراعان.
«ساۋالنامانىڭ نەگىزگى كورسەتكىشتەرىن «قازاقستان جاستارى – 2022» ۇلتتىق بايانداماسىندا كەلتىرىلگەن دەرەكتەرمەن سالىستىرا كەلە, وسى كەزەڭدە رەپرودۋكتيۆتى دەنساۋلىق تاقىرىبىنا قىزىعۋشىلىق تانىتقان جاستاردىڭ ۇلەسى 44,2%-دان 68,9%-عا دەيىن ارتقانىن بايقادىق. ءوسىم, اسىرەسە, اۋىل جاستارى اراسىندا بايقالدى. مۇندا كورسەتكىش 32,2%-دان 48,3%-عا دەيىن ارتىپ وتىر. Telegram-بوتتىڭ كومەگىمەن ەل جاستارى مامانداردان تەگىن كەڭەس الادى. بىزگە كوبىنە 15 پەن 22 جاس ارالىعىنداعى جاسوسپىرىمدەر مەن جاستار جۇگىنەدى. ولاردى جىنىستىق دەنساۋلىققا, باسقا ماسەلەلەرگە قاتىستى الۋان تاقىرىپتار قىزىقتىرادى», دەيدى ق.مىرحايداروۆ.
بۇگىندە جوباعا 2000-نان استام ەرىكتى بەلسەندى قاتىسسا, ولاردىڭ بارلىعى كاسىبي مامانداردان ارنايى دايىندىقتان ءوتىپتى. سونىمەن قاتار قوعام بەلسەندىلەرى ءۇن قوسىپ, «saulyq.kz» وقىتۋ پلاتفورماسىن قۇرعان. پلاتفورمادا فيزيولوگيا, ەتەككىر تسيكلى, ەرلەر دەنساۋلىعى, باسقا دا ماڭىزدى تاقىرىپتار تۋرالى اقپاراتتىق بەينەروليكتەر مەن پودكاستار ۇنەمى جاريالانادى. ونداعى تانىمدىق اقپاراتتاردى 2 ميلليوننان ادام استام قاراپ ۇلگەرگەن.
ء«بىز ەلدىڭ ءار وڭىرىندە قوزعالىس كوشباسشىلارىن دايارلاۋعا ارنالعان وقىتۋ كۋرستارىن ۇيىمداستىردىق. الەۋەتتى ۆولونتەرلەر جىنىستىق جولمەن بەرىلەتىن ينفەكتسيالاردىڭ الدىن الۋعا, جۇكتىلىك پەن رەپرودۋكتيۆتى دەنساۋلىققا تەرىس فاكتورلاردىڭ اسەرىنە قاتىستى ماسەلەلەردى زەرتتەدى. ءار ايماقتا ەڭ ۇزدىك ناتيجە كورسەتكەن 50 قاتىسۋشى قوزعالىستىڭ تالىمگەرى اتاندى. ولار ەندى ءوز وبلىسىنداعى اۋىلدىق جەرلەردىڭ جاستارى اراسىندا ءتۇسىندىرۋ جۇمىسىن جۇرگىزەدى. جەتكىنشەكتەر ەرەسەكتەرگە قاراعاندا ءوز قاتارلاستارىنا كوبىرەك سەنەتىندىكتەن, «تەڭبە-تەڭ» قاعيداسىن ەڭ ءتيىمدى امال دەپ بىلەمىز», دەدى ق.مىرحايداروۆ ءسوزىن تۇيىندەپ.
رەسپۋبليكالىق فورۋمدا اكۋشەرلىك جانە گينەكولوگيا جونىندەگى دوتسەنت, ۋرولوگ-اندرولوگتەرمەن قاتار, جاستار قوزعالىسىنىڭ ۇيلەستىرۋشىلەرى دە قوزعالىس ۆولونتەرلەرىنە ارنالعان ترەنينگ ۇيىمداستىردى. فورۋمنىڭ سوڭى «مەديتسينا جاستارى» قوعامدىق بىرلەستىگى ۇيىمداستىرعان «Medical Youth Ball»-عا ۇلاستى. كەش قوناقتارى ۆولونتەرلەردىڭ ونەرىن تاماشالادى. ۇزدىك ەرىكتىلەردى ماراپاتتاۋ سالتاناتى ءوتتى.