جارىس كۇندەلىگى

شورت-ترەكتەن ەلىمىزدىڭ ايەلدەر قۇراماسى بەيجىڭدەگى «World Tour» ءتۋرنيرىنىڭ كەزەڭدىك سايىسىن ءۇشىنشى ورىنمەن قورىتىندىلادى. ءبىزدىڭ كوماندا ساپىندا ماليكا ەرمەك, الينا اجىعاليەۆا, يانا حان, ولگا تيحونوۆا ونەر كورسەتتى. باس جۇلدەنى وڭتۇستىك كورەيا ولجالاسا, قىتاي كۇمىسكە قول سوزدى. سانكت-پەتەربۋرتەگى «ناشە دەلو» دەپ اتالاتىن پروموۋشەن ۇيىمداستىرعان تۋرنيردە اسىلجان باقىتجان ۇلى (15-4-1) كەزىندە UFC-دە ونەر كورسەتكەن رەسەيلىك ءشامىل گامزاتوۆپەن (14-2) كۇش سىناستى. ءۇش راۋندتىڭ قورىتىندىسىندا بارلىق تورەشى ءبىزدىڭ جىگىتتىڭ مىقتىلىعىن ءبىراۋىزدان مويىندادى. 22 اقپاندا ەر-ريادتا ورتا سالماقتاعى كاسىپقوي بوكسشىلار – دومينيكاندىق كارلوس ادامەس پەن ۇلىبريتانيالىق حامزا شيرازدىڭ جۇدىرىقتاساتىنى بەلگىلى. ولار WBC-ءتىڭ التىن بەلبەۋى ءۇشىن تالاسادى. وسى كەزدەسۋدە جەڭىسكە جەتكەن ساڭلاق ەكى بىردەي بەلدى نۇسقانىڭ چەمپيونى جانىبەك الىمحان ۇلىمەن جەكپە-جەككە شىعادى. بۇل جايىندا ساۋد ارابياسىنىڭ ويىن-ساۋىق ىستەرى بويىنشا باس باسقارما توراعاسى, بوكستىڭ سۋپەرينۆەستورى تۇركي ءال اش-شەيح مالىمدەدى. ەگەر وسى جوسپار جۇزەگە اسسا, وندا جەر-جاھان جانكۇيەرلەرى الاپات ايقاستىڭ كۋاسى بولاتىنى انىق. گرەپپلينگتەن ەكى دۇركىن الەم چەمپيونى سامات ايتپانبەتكە «دوپينگ قولداندى» دەگەن ايىپ تاعىلدى. بۇل اقپارات حالىقارالىق تەستىلەۋ اگەنتتىگىنىڭ (ITA) رەسمي سايتىندا جاريالاندى. ەگەر ول راستالسا, وندا 27 جاستاعى الماتىلىق ارلان بيىل استانادا وتكەن دۇنيەجۇزىلىك دودادا ولجالاعان باس جۇلدەسىنەن ايىرىلىپ, بىرەر جىلعا ۇلكەن سپورتتان شەتتەتىلەدى. ال ونىڭ التىنى ەلىمىزدىڭ تاعى ءبىر بەلدى گرەپپلەرى نۇربەك مىرزالينوۆكە تابىس ەتىلەدى. ءدال سول سپورتشىنى سامات ەلوردادا وتكەن جارىستىڭ فينالىندا ۇتقان ەدى. شۆەيتساريانىڭ نون قالاسىندا فۋتبولدان 2025/26 جىل­دارى ۇيىمداستىرىلاتىن جاسوسپىرىمدەر (U-17) اراسىنداعى ەۋرو­پا چەمپيوناتىنىڭ ءبىرىنشى كەزەڭىنىڭ جەرەبەسى تارتىلدى. ەلىمىز ­8-توپقا ءتۇستى. قارسىلاستارىمىز – حورۆاتيا, نيدەرلاند, البا­نيا. 14 توپتىڭ ارقايسىسىندا ءبىرىنشى, ەكىنشى ورىندى يەلەنگەن ­كوماندالار ا ليگاسىنىڭ ەكىنشى كەزەڭىنە وتەدى. قالعاندارى ۆ ليگاسىندا باق سىنايدى. ال جارىستىڭ فينالدىق بولىگىنىڭ شىمىلدىعى ەستونيادا تۇرىلەدى. استانانىڭ «بارىسى» قحل-دىڭ تۇراقتى بىرىنشىلىگىندە قاتارىنان سەگىزىنشى رەت جەڭىلىس تاپتى. جۇما كۇنى ءبىزدىڭ حوك­كەيشىلەر چەرەپوۆەتستە جەرگىلىكتى «سەۆەرستالعا» 3:5 ەسەبىمەن ۇتىلدى. جەكسەنبىدە سانكت-پەتەربۋرگتىڭ سكا-سى سان سوقتىرىپ كەتتى – 0:1.