«Sportico» پورتالى 2024 جىلدىڭ قورىتىندىسى بويىنشا ەڭ كوپ تابىس تاپقان تەننيسشىلەردىڭ ءتىزىمىن جاريالادى. باقۋاتتىلار كوشىن الەمنىڭ ءۇشىنشى راكەتكاسى كوري گاۋفف باستاپ تۇر.
20 جاستاعى اقش-تىڭ وكىلى بيىل اۋستراليا اشىق بىرىنشىلىگىنىڭ جارتىلاي فينالىنا دەيىن جەتىپ, WTA-نىڭ بىرنەشە تۋرنيرىندە توپ جاردى. سونىمەن قاتار جۇپتىق سايىستاردا دا ءساتتى وينادى. وسى كورسەتكىشتەرىنىڭ ناتيجەسىندە گاۋفف بيىل 30,4 ملن اقش دوللارى (9,4 ملن دوللار ءتۇرلى تۋرنيردەگى سىياقى + 21 ملن دوللار دەمەۋشىلەر بولگەن قاراجات) كولەمىندە ولجاعا كەنەلدى. ەكىنشى ورىندا – يگا شۆەنتەك. ەكى جىلدان اسا ۋاقىت ەشكىمگە دەس بەرمەي, الەمدىك رەيتينگتە جەكە-دارا كوش باستاعان 23 جاستاعى پولشانىڭ وكىلى بيىلعى ماۋسىمدى ەكىنشى ورىنمەن قورىتىندىلادى. جازدا ول رولان گارروستىڭ جەڭىمپازى اتاندى. باسقا دا ءىرى دودالاردا ءتاۋىر ناتيجە كورسەتتى. شۆەنتەكتىڭ تابىسى – 21,4 ملن دوللار. (8,4 ملن دوللار سىياقى + 13 ملن دوللار دەمەۋشىلەر). ۇزدىك ۇشتىكتى چجەن تسينۆەن تۇيىندەپ تۇر. WTA تىزىمىندە بەسىنشى ساتىعا جايعاسقان 22 جاستاعى قىتاي قىزىنىڭ تابىسى وسى ماۋسىمدا 20,6 ملن دوللارعا كوبەيدى (5,6 ملن دوللار سىياقى + 15 ملن دوللار دەمەۋشىلەر). جىل باسىندا چجەن مەلبۋرندەگى جارىستىڭ فينالىندا وينادى. سونداي-اق ۇزدىك بەستىكتىڭ قاتارىندا بەلارۋستىك ارينا سوبولەنكو – 17,7 ملن دوللار (9,7 ملن دوللار سىياقى + 8 ملن دوللار دەمەۋشىلەر) مەن جاپونيالىق ناومي وساكا – 15,9 ملن دوللار (870 مىڭ دوللار سىياقى + 15 ملن دوللار دەمەۋشىلەر) سىندى بۇرىمدىلار بار.
ەلەنا رىباكينا باقۋاتتىلاردىڭ رەيتينگىندە 14-ورىنعا تۇراقتادى. 2024 جىلى ەلىمىزدىڭ ءبىرىنشى, الەمنىڭ التىنشى راكەتكاسىنىڭ ەسەپشوتىنا 7,9 ملن دوللار اۋدارىلدى. ونىڭ 3,9 ملن دوللار جارىستارعا قاتىسقانى ءۇشىن بەرىلگەن سىياقى بولسا, 4 ملن دوللار – دەمەۋشىلەردەن تۇسكەن قاراجات.